Ii leat šat jearaldat das ahte beassá go loddet, muhto movt. Boahtte lávki lea dohkkehit ahte loddemis lea iešheanalis riektevuođđu.

– Báikkálaš bargu lea leamaš mearrideaddji dan ovdáneamis maid leat olahan. Boarri, Sámi bivdo- ja meahcástansearvi ja Guovdageainnu suohkan ovttas loddenlávdegottiin leat leamaš guovddážis barggus, dadjá sámediggeráđđi Maja Kristine Jåma (NSR).

Ortnet lea viiddiduvvon geográfalaččat, bivdoeriid dáfus, šlájaid dáfus ja dainna lágiin ahte njiŋŋelas lottiid šaddá lohpi bivdit.  

Liikká ii miehtan sámediggeráđđi láhkaásahussii. Departemeanta lea ovdánan buori guvlui, muhto 500-earri ii leat dan dihte nu buorre, go dovdat duohtavuođa.   

– Mun dohkkehan dálkkádat- ja birasministara dáhtu buoridit dili. Seammás ii leat golmmageardán lassáneapmi nu ollu go álggu rájes ii leat leamaš bálljo mihkke. Sámediggeráđđi oaivvilda ahte láhkaásahus ollislaččat rihkku sámiid vuoigatvuođaid doaimmahit sámi dološvieruid ja kultuvrra, dadjá Jåma.

Báikkálaš máhtu ferte dohkkehit ja nannet.

– Ovddasguvlui šaddá dehálaš bearráigeahččat ahte dálkkádat- ja birasministtar doallá lohpádusas háhkat máhtu njurgomáddodaga birra. Dainna lágiin sáhtášii njurgo maiddái váldit mielde boahtte láhkaásahusáigodahkii, loahpaha Jåma.

Loga eambbo dan ođđa loddenláhkaásahusa birra (giđđalodden) miessemánu 1. beaivvi 2023 rájes gitta geassemánu 6. beaivvi 2028 rádjái (regjeringen.no). 

Sámediggeráđđi Maja Kristine Jåma (NSR) addá jearahallama ja vástida gažaldagaide, tlf: +47 472 42 36, maja.kristine.jama@samediggi.no