– Lean ilus go mii dál leat ožžon ođđa SáNuL. Dat ovddastit viidodaga sihke agi, geografiija ja giela dáfus, mii nanne SáNuL. Ođđa SáNuL:in mii sihkkarastit sihke kontinuitehta ja vejolašvuođaid ođđa lahtuide, dadjá sámediggeráđđi Mikkel Eskil Mikkelsen (NSR).

Elle Rávdná Näkkäläjärvi Guovdageainnus joatká jođiheaddjin. Son lea leamaš jođiheaddjin guokte jagi ja lea nammaduvvon guovtti ođđa jahkái. Suinna ovttas joatkiba maid Aina Madelén Nordsletta Aslaksen ja Inga Márjá Lango lahttun ođđa lávdegottis. 

– Lea buorre go mis leat ovddeš miellahtut geain lea vásihus ja ođđa miellahtut geat ovddastit ođđa sámi nuoraidjienaid. Nuoraid jietna galgá gullot dálá servodagas, lohká jođiheaddji Elle Rávdná Näkkäläjärvi.

Ođđa miellahtut leat nammaduvvon Sámedikki joavkkuid ja nuoraidorganisašuvnnaid evttohusaid vuođul, ja sii ovddastit geográfalaš viidodaga Norgga bealde Sámis. 

– Mun illudan deaivvadit ođđa SáNuL:in ja ovttasbargagoahtit singuin. Boahtte áigodagas lea deaŧalaš nannet vejolašvuođa árjjalaččat čađahit sin mandáhta. SáNuL áigu searvat Sámedikki Duohtavuođa- ja soabahankommišuvnna raportta meannudeapmái, dadjá Mikkelsen.

Dá lea ođđa SáNuL:

Lahtut:                                                    

Elle Rávdná Näkkäläjärvi                                                                     
Aina Madelén Nordsletta Aslaksen                       
Inga Márjá Lango                                                      
Piere Åvla Bransfjell                                                 
Jon Anta Eira Åhrén       

Várrelahtut:

Sunna Svendsen                                                        
Linnea Knutsen
Nils Anders Appfjell
Ronja Vara Sannerud
Odd Ánde Anti