Njukčamánu 18. beaivvi lágiduvvui vuosttaš gulahallančoahkkin NBS kantuvrrain Osloves. NBS-jođiheaddji Tor Jacob Solberg, váldočálli Anders Bakke Klemoen ja sámediggeráđđi Elisabeth Erke (Gb) oassálaste.

Gulahallan fágaolbmuiguin báikkálaččat, regionálalaččat ja nationálalaččat lea hui deaŧalaš, ja čoahkkima guovddážis lei deaŧalaš áššiid lonohallan eanandoallopolitihkas, ja ealáhusa hástalusat.

– NBS lei vuđolaččat lohkan Sámedikki cealkámuša eanadoallošiehtadallamiidda, ja buvttii buriid cealkámušaid ja máhcahemiid Sámedikki bargui. Dáid máhcahemiid váldit mielde viidáset barggus eanandoalu ovddas, dadjá sámediggeráđđi Elisabeth Erke.

Boraspireváttisvuođat, ja erenoamážit hástalusat duođaštangáibádusaid ektui, digaštallojuvvojedje. Goappašat bealit leat ovttaoaivilis das ahte dárbbašuvvo eanet sorjjasmeahttun máhttu nálleloguid birra, ja ahte gáibádusat duođaštit elliid maid boraspiret leat speadjan, fertejit šaddat álkibun.

NSB oaivvildii maid ahte ferte geahččat daid eavttuid maid luondu addá go galgá árvvoštallat makkár buvttademiid háliidit ovdánahttit Davvi-Norggas. Guohtunealáhus lea erenoamáš deaŧalaš, ja Romssas ja Finnmárkkus leat hui buorit meahcceguohtumat mat berrejit leat vuođđun biebmobuvttadeapmái. 

Suodjalusa gearggusvuohta ja váráiduhttin davvin lei lunddolaš fáddán otná ráfehis máilmmidilis, ja lea deaŧalaš ahte Sámediggi lea dihtomielalaš Suodjalusa sisaoastinšiehtadusaid ságastallamiid birra. Dál digaštallojuvvo gokko ođđa brigáda kommandoguovddáš galgá ásahuvvot davvin, ja dakkár ásaheapmi sáhttá addit buriid váikkuhusaid sámi eanadollui ja eanadollui sámi guovlluin, ja seammás ferte sihkkarastit ahte lea buorre gulahallan ja ásahit buriid kanálaid, nu ahte Suodjalus ja guohtunealáhus sáhttet doaibmat ovttas.

Dál ii leat makkárge viidásetbuvttadeapmi Kárášjoga njuovahagas, ja de ferte geahčadit makkár vejolašvuođat leat oažžut eanet buvttaovddideami fylkkas.

Mielkebuvttadeapmi ságastallojuvvui maiddái, ja dál lea earrodeavdingráda 87 proseantta Finnmárkkus. Dákko lea vejolaš lasihit buvttadeami ovddasguvlui.