Raporta «Deanu báikkálaš hálddašeapmi», maid konsuleantafitnodat Arvil lea čállán, čájeha ahte báikegottis lea dálá lágaid ja šiehtadusaid vuođul mealgat stuorát vejolašvuohta váikkuhit go dan maid dál dahká. Vaikko báikegotti cealkámušat váldojuvvojit vuostá, de čájeha raporta ahte dain hárve lea dadjamuš mearrádusaide ja bohtosiidda.

Sámedikki presideanta Silje Karine Muotka (NSR) deattuha raportta mávssolašvuođa:

– Dát bargu čielgasit čájeha ahte lea dárbu nannet báikegotti jiena hálddašeamis. Deanučázádat ii leat dušše luondduriggodat, muhto mávssolaš oassi guovllu birgenlágis ja kultuvrras. Boahttevaš hálddašanmállet fertejit eambbo deattuhit ja atnit árvvus báikegottiid gelbbolašvuođa ja árbevirolaš máhtu, dadjá Muotka.

Raporta earret eará evttoha buoret diehtojuohkima riikkarájiid rastá, eambbo deattuhit árbevirolaš máhtu mearridanproseassain, ja atnit riikkaidgaskasaš báikkálaš hálddašanmálliid, maiguin leat lihkostuvvan, inspirašuvdnan.

Sámediggi lea juo várren ruđa gávdnosiid čuovvuleapmái, ja áigu lágidit semináraid ja bargobájiid mat čohkkejit buot aktevrraid geat leat mielde barggus. Raportta bohtosat ovdanbuktojuvvojit luossadialogas Ohcejogas miessemánu 20. beaivvi, ja doppe maiddái digaštallet viidáseappot barggu áššeosolaččaiguin. 

Loga raportta dáppe.

Deanu hálddašeapmi 2025.

Ásahusat ja sin rollat dálá hálddašeamis ja báikkálaš hálddašeamis.

Dokumeanttat gávdnojit dušše davvisámegillii.