Silje Karine Muotka Ørjan Marakatt Bertelsen/Sámediggi

– Son lea hui čeahpes olmmoš, ja lea čájehuvvon ahte sus leat maid jođihanattáldagat. Dan lean oaidnán sihke nuoraidpolitihkas ja min vuogádagas. Dasa lassin son dovdá áššesurggiid. Lean hui ilus go son lea dadjan juo, dadjá sámediggepresideanta Silje Karine Muotka (NSR).

Maren Benedicte Nystad Storslett, Oskála Mákreda Ristiinná Márjjá Maren, lea 28 jahkásaš ja Guovdageainnus eret. Son válljejuvvui fásta sámediggeáirrasin Norgga Sámiid Riikkasearvvi ovddas Ávjovári válgabiires 2021:s. Dasa lassin lea son leamaš NSR várreáirras ovddit válgaáigodagas, 2017-2021. Dán válgaáigodagas lea son leamaš Bajásšaddan-, fuolahus- ja oahppolávdegotti lahttu, ja son lea maid Sámi parlamentáralaš ráđi lahttu.

Maren Benedicte Nystad Storslett Árvu/Sametinget

Nystad Storslett oažžu dáid politihkalaš ovddasvástádussurggiid sámediggeráđis:

• Giella
• Bajásšaddan, oahpahus ja dutkan
• Nuoraidpolitihkka
• Máŋggadáfotvuohta ja LHBTQi+

Maren Benedicte Nystad Storslett álgá bargui disdaga skábmamánu 12. beaivvi. Son lea gearggus bargagoahtit ollesáiggepolitihkkárin sámediggeráđis.

– Šaddá miellagiddevaš bargat daiguin áššesurggiiguin. Oainnán maid vejolašvuođa loktet oahpahus- ja giellasuorggi Duohtavuođa- ja soabahankommišuvnna raportta čuovvoleamis, lohká Nystad Storslett.