Ođđa sámi designbálkkašupmi

Ođđa sámi designbálkkašupmi

Sámediggi áigu ovddidit vel eambbo sámi designa ovddos guvlui ja addit bálkkašumi buorre sámi designa ovddas. – Mii sávvat vel eambbo sámi designaovddideami ja oaidnit ahte dat lea hui geasuheaddji, ja addá midjiide ođđa vejolašvuođaid, dadjá sámediggeráđđi Silje K. Muotka (NSR).

Deaddil ja stuora govva ihtá

Šoop Šoop galgá lágiduvvot čakčamánu 6. ja 7. beaivvi Troanddima Dáiddahállas, ja lea ovddemusat sámi designeriid beaivi ja sin vejolašvuohta nannet iežaset fierpmádaga, lasihit gávpejođu ja maiddái márkanoasi.

– Ođas dán jagi lea ahte mii geiget Šoop Šoop-bálkkašumi. Sámi designa lea erenoamáš ja das lea stuora potensiála, maid mii ovddidit sámi designa arenas, ja dasto áigut maid addit sierra fuomášumi buorre sámi designii, dadjá Muotka.

Bálkkašupmi geigejuvvo Šoop Šoop - Sámi design days oktavuođas, mii dán jagi lágiduvvo čakčamánu 6. ja 7. beaivvi Troanddima Dáiddahállas. Vuoiti oažžu 50.000 ruvnno ja vuoittu maid soames duojár lea duddjon.

Jury

Jurys, mii juohká bálkkašumi, leat sámediggeráđđi Silje K. Muotka, kárášjohkalaš Gunvor Guttorm ja Pär-Joel Utsi, Ruoŧa bealde Jåhkåmåhkes eret. Guttormas lea guhkes ja viiddis hárjáneapmi duojis, ja Utsi lea bures lihkostuvvan iežas riikkaidgaskasaš fitnodagain, Vaimoin, mii veahkeha miehtá máilmmi fitnodagaid e-gávppašemiin.  

Fitnodagat árvvoštallojuvvojit čuovvovaš eavttuid vuođul:

  • Ahte lea váldodoaibma Sámis
  • Ahte vuoiti sáhttá čujuhit buori gánnáhahttivuhtii ja nana ahtanuššamii
  • Addá positiiva nettodietnasa sámiide ja/dahje báikegoddái
  • Lea ovdánahttán sámi designa jáhkehahtti vugiin ja árvvusatnimiin, ja lea das bidjan fokusa álgoálbmogiid árvvuide ja ceavzilvuhtii
  • Lea ovdamunni jos fitnodat geavaha sámegiela iežas promoteremis

Lihkostuvai

Šoop Šoop - Sámi design days lágiduvvojedje vuosttaš geardde 2020 guovvamánu Romssas. Vuosttaš beaivi lea várrejuvvon sámi designeriidda ja ostiide, ja nuppi beaivvi leat fas rabas meassut sámi designeriidda ja gehččiide.

– Diimmá Šoop Šoop-bohtosat čájehit ahte sihke sámi designerat, oastit ja geahččit leat hirbmat duhtavaččat lágidemiin, ja danne sávvat mii joatkit ja viidáseappot ovddidit dan buori barggu mii lea dahkkon Šoop Šoopain. Dat lei njuolgut sukseassa.

Gažaldagaide vástida ja addá jearahallama sámediggeráđđi Silje Karine Muotka (NSR), mob. +47 984 87 576, silje.karine.muotka@samediggi.no