Ođđa šiehtadus mielddisbuktá oktiibuot 6 283 000 ruvnno juolludusa jagis 2026. Dat lea 600 000 ruvnno lasáhus dan ektui mii jagis 2025 lei várrejuvvon, mii mearkkaša 10,56 % lassáneami.

Šiehtadallamiin ledje Sámediggeráđđi ja sii geat ovddastedje sámi valáštallanorganisašuvnnaid: Sámi Valáštallan Lihtu (SVL) ja FA Sámi, Čuoigan, viehkan ja njoarostanlihtu (SVN) ja Sámi Heargevuodjin Lihtu (SHL).

Sámediggeráđđi deattuha man dehálaš buorre ovttasbargu sámi valáštallanorganisašuvnnaiguin lea, ja illuda ain ovdánahttit sámi valáštallama boahttevaš jagiid.

– Sámediggeráđđi lea duhtavaš go šiehtadusoasálaččat leat soahpan ođđa valáštallanšiehtadusa. Sámi valáštallan lea mávssolaš identitehta ja oktiigullevašvuođa nannemii, ii dušše báikkálaš dásis, muhto maiddái riikkarájiid rastá. Valáštallan veahkeha duddjot searvevuođa ja dan dovddu ahte mii leat rámis, dadjá sámediggeráđđi Ole-Henrik Bjørkmo Lifjell.

SVL jođiheaddji Håkan Kuorak lea duhtavaš bohtosii, erenoamážit danne go SVL lea searvame Arctic Winter Gamesii jagis 2026.

– Arctic Winter Games 2026 šaddá dehálaš arenan sámi mánáide ja nuoraide. Doppe sis lea vejolašvuohta deaivvadit eará álgoálbmogiiguin, gilvalit ja vásihit searvevuođa iešguđet kultuvrraid ja gielaid gaskkas. Mii leat ilus go šiehtadus sihkkarastá doarjaga gilvvuide searvamii, dadjá Håkan Kuorak, SVL jođiheaddji.