Sámediggeráđđi evttoha lasihit oahpponeavvoráhkadeami doarjaga badjel 10 miljon ruvnnuin. Dat dagaha 57 proseantta lassáneami 2020 bušeahta ektui.
– Oppalohkái mii ovdanbuktit sámi oahpponeavvoráhkadeapmái ođđa vugiid ja mieđuštit ođđa geainnuide. Mii diehtit ahte ođđa oahppoplánat gáibidit ođđa oahpponeavvuid, ja skuvllain lea dál duođalaš dárbu daidda, dadjá sámediggeráđđi Mikkel Eskil Mikkelsen (NSR).
Oktasaš sámi historjáoahpponeavvu
Sámediggeráđđi bidjá ovdan ođđa áŋgiruššama oahpponeavvosuorgái 2021 bušeahttaárvalusas. Sámediggeráđđi evttoha áŋgiruššat rádjerasttildeaddji oahpponeavvoovttasbargui historjáoahpponeavvu pilohtas.
– Dán suorggis leat stuora vejolašvuođat ovttasbarggus sámedikkiid gaskkas. Mis leat guokte raportta mat čájehit dakkár ovttasbarggu potensiála, ja mun illosan čuovvulit Váibmogiela ja Rájáhis sámi oahpahusa dáinna vugiin. Diehttelasat galgá mis sápmelaččain leat oktasaš sámi historjáoahpponeavvu, dadjá Mikkelsen.
Prošektii várrejuvvo 500 000 ruvnno 2021:i.
Rámmašiehtadusat
Sámediggeráđđi lea máŋgii dieđihan doaibmabijuid oahpponeavvoráhkadeami buorideami várás. Sámediggi lea bargame ásahit rámmašiehtadusaid lágádusaiguin sihkkarastin dihte diehttevašvuođa lágádusaide. Boahtte jagi bušeahtas evttohit viidásit áŋgiruššat rámmašiehtadusain 6 miljon ruvnnuin.
– Mii fertet čađagaska geahččalit buoridit ja hábmet eanet einnostahtti ortnegiid oahpponeavvoráhkadeami várás. Sámediggeráđđi fállá dál lágádusaide einnostahtti rámmaid almmolaš háhkandoaimmaid bokte, ja oaivvilda ahte dát sáhttá sihkkarastit lágádusaide vejolašvuođa plánet guhkitáigásaš plánaid, dadjá Mikkelsen.
Digitála oahpponeavvut
Ođđa oahppaplánat skuvllas gáibidit ahte ođđa sámi oahpponeavvut ilbmet jođánit. Ráđđehus evttoha 2021 stáhtabušeahttaárvalusas háválašjuolludusa sámi digitála oahpponeavvuide.
– Sámediggeráđđi čuovvula ráđđehusa árvalusa ja vuoruha digitála oahpponeavvuid ráhkadeami. Digitaliseren lea guovddážis fágaođastusas ja oppalohkái servodatovddideamis, ja sámediggeráđđi čuovvula dan go čielgasit vuoruha sámi digitála oahpponeavvuid ráhkadeami, main lea buorre kvalitehta, loahpaha Mikkelsen.
Sámedikki 2021 bušeahtta - sámediggerádi mearrádusárvalus (PDF, 2 MB)
Gažaldagaid ja jearahallamiid vástida sámediggeráđđi Mikkel Eskil Mikkelsen (NSR).
+47 917 42 161 mikkel.eskil.mikkelsen@samediggi.no.