Sámediggeráđđi mearridii ođđajagimánu 13. b. ásahit gaskaboddosaš, sorjjasmeahttun ortnega vuostáiváldit ja meannudit dieđihemiid ja fuolastusdieđuid. Ortnet galgá leat áššiid váste mat gusket bajimus hálddahuslaš dássái dahje dilálašvuođaide main dábálaš meannudanvuogit sáhttet bohciidahttit gažaldagaid bealátkeahtesvuođa dahje rollačielggadeami birra, bargiidgiehtagirjji ja Sámedikki dieđihanrutiinnaid mielde. BDO levere bálvalusa.
Sámediggepresideanta Silje Karine Muotka
Ørjan Marakatt Bertelsen
– Bálvalus galgá addit sorjjasmeahttun ja bealátkeahtes áššečielggadeami mii sihkkarastá ahte mii fuolahit čorgatvuođa, beliid vuoigatvuođaid ja bargobiraslága mearrádusaid, dadjá sámediggepresideanta Silje Karine Muotka (NSR).
Dat mielddisbuktá maiddái ahte presideanta ii oainne BDO barggu ovdal go áššeráhkkaneapmi lea gárvvis.
– Danne ii leat áigemearri áššeráhkkaneapmái. Dehálaš lea ahte áššemeannudeapmi lea vuđolaš. BDO bargá áibbas iešheanalaččat, dadjá Muotka.
Dákkár proseassain galget fáktadieđut čielggaduvvot, ja guoskevaš bealit galget oažžut kontradikšuvdnavejolašvuođa ovdalgo árvvoštallamat dahkkojuvvojit. Rivttes áššemeannudeami dihte ja olbmuid dihte geaidda dát guoská, de ii kommentere sámediggepresideanta ovttaskas áššiid.
– Eanaš áššiin mun lean vuosttažettiin sámediggepresideanta geas lea ovddasvástádus politihkalaš proseassain. Dán áššis lea mus lassin bargoaddiovddasvástádus. Dat mielddisbuktá ahte mun ferten sihkkarastit sihke dieđihuvvon olbmo ja dieđiheaddji vuoigatvuođaid. Mun bivddán áddejumi dasa ahte in sáhte addit dievaslaš dieđuid ovttaskas áššiid birra dál, dadjá sámediggepresideanta Silje Karine Muotka.
Sámediggepresideanta deattuha ahte lea deaŧalaš ahte son ii ovddalgihtii konkludere almmá áššemeannudeami haga.
Muotka lei bovden joavkojođiheddjiid čoahkkimii vuossárgga guovvamánu 16. b. Ulbmil čoahkkimiin lei muitalit olgguldas dieđihanortnega birra ja barggu birra mii lea jođus, ja maiddái čilget iežas rolla.
– Mii joatkit dainna ahte juogadit dieđuid joavkojođiheddjiiguin ja dievasčoahkkimiin, dadjá son.
Go olgguldas guorahallan lea loahpahuvvon ja ollislaš fáktavuođđu lea sajis, de áigu sámediggeráđđi sámediggepresideantta bokte dieđihit viidáset čuovvoleami birra.