Elisabeth Erke Ørjan Marakatt Bertelsen

– Álgoálbmotnissonat gillájit dávjá liige vealaheami. Go mii oaidnit ahte dásseárvu ja nissonolbmuid vuoigatvuođat dađistaga deaividit stuorát ja stuorát vuostálastimiid máilmmiviidosaččat, de balan ahte álgoálbmotnissonolbmuide čuohcá dát erenoamáš garrasit. Danne áiggun mun bargat dan ala ahte min jienat guldaluvvojit, dadjá sámediggeráđđi Elisabeth Erke (Gb).

The Commission on the Status of Women (CSW), ON Nissonkommišuvdna, lágida juohke jagi njukčamánus guovtti vahkkosaš konferánssa New Yorkas. Das ságastallojuvvojit máilmmiviidosaš nisson- ja dásseárvoáššit ja bealit šiehtadallet loahppajulggaštusaid main lea stuorra mearkkašupmi riikkaidgaskasaš dásseárvobargui. UN Women koordinere konferánssa. Dán jagi lágiduvvo ON Nissonkommišuvnna čoahkkin, mii lea kommišuvnna 69. čoahkkin, áigodagas njukčamánu 10.-21.b. 2025 ON váldoguovddážis New Yorkas.

CSW 69 čalmmustahttá ahte lea 30 jagi Beijing-konferánssa rájes, ja deattuha raporteret daid bohtosiid maid leat olahan doaibmaplána čađaheamis. Galgá maiddái šaddat ovttaoaivilvuohta boahttevaš njealji nissonkommišuvnna fáttáid ektui, ja lea ságastallan nissonkommišuvnna ealáskahttima birra. Šiehtadallojuvvo politihkalaš julggaštus, mii mearriduvvo kommišuvnna vuosttaš beaivvi.

– Čoahkkimis áiggun bargat dan ala ahte álgoálbmogiid oassálastin nannejuvvo oassin nissonkommišuvnna ođđasis ealáskahttimis, čájehit solidaritehta eará guovlluid álgoálbmotnissoniiguin, ja maiddái juogadit vásáhusaid Sámis, joatká Erke.

Sámediggeráđđi searvá Nissonkommišuvnna alladási vahkkui, ja sus leat čoahkkimat ja geatnegasvuođat oassin Norgga sáttagottis. Dasa lassin son searvá álgoálbmotorganisašuvnnaid koordinerenčoahkkimii ja golmma paneladigaštallamii dan botta go son lea doppe; okta seksuála loavkašuhttimiid birra bargoeallimis, okta ásahuslaš mekanismmaid birra eastadan dihte veahkaválddi nissonolbmuid vuostá ja okta dálkkádatrievdamiid váikkuhusaid birra nieiddaide ja nissonolbmuide. Sámediggi lea maid buktán cealkámuša politihkalaš julggaštussii ja bargoplánii boahttevaš nissonkommišuvnnaide.

Loga eanet Sámedikki dásseárvobarggu birra: Dásseárvu - Sámediggi