Bargobáiki lea okta Sámedikki kánturbáikkiin gos lea guoros kántursadji.
Álgin farggamusat.
Ovddasvástádussuorggit
Giellaossodagas lea ovddasvástádus Sámedikki guhkes áiggi giellaáŋgiruššamis dahje giellaloktemis. Dán barggu váldomihttomearrin lea oažžut olles servodaga searvat sámegielaid oainnusmahttimii ja ovddideapmái sihke priváhta ja almmolaš suorggis. Ossodagas lea ovddasvástádus politihka hábmemis ossodaga ovddasvástádussurggiin, ja galgá dasto hálddašit váikkuhangaskaomiid mat leat giellasuorggis, ovttasbargošiehtadusaid ja eará doaibmabijuid.
Ossodagas leat golbma juhkosa:
- Báikenamma- ja gielladikšunjuogus
- Giellahálddašan- ja politihkkajuogus
- Terminologiijajuogus
Barggut
Ossodatjođiheaddjin leat don oassi hálddahusa jođiheaddjijoavkkus ja šattat bargat lávga politihkalaš jođiheddjiiguin.
Guovddáš ovddasvástádussuorggit ja barggut leat:
- Ossodaga ja ossodaga fágalaš doaimma jođiheapmi
- Organisašuvdnaovddideapmi ja ovddasvástádus bargiin
- Bušeahtta ja boađusovddasvástádus
- Strategiijabargu
Gelbbolašvuohta
Don leat jođiheaddji ja oaivadeaddji, gii nagodat hukset buori organisašuvdnastruktuvrra, ja dasto nana ja gelbbolaš teama. Jođiheaddjin don leat rabas máhcahusdieđuide ja dus lea dáidu evalueret sihke du iežat ja birrasa. Nana gálggaid bokte ovttasbarggus ja gulahallamis lea dus dáidu juksat bohtosiid ovttasdoaibmamin earáiguin.
Mii ohcat du geas leat:
- Relevánta oahppu masterdásis, vejolaččat bálddalaga relevánta bachelordásiin ja vásihusain
- Relevánta jođiheaddjivásihus
- Nana máhttu fágasuorggis
- Strategalaš gelbbolašvuohta
- Máhttu sámi servodaga birra
- Máhttu politihka birra, prošeaktajođiheamis ja mearrádusproseassain
- Nana digitála gelbbolašvuohta
Dasto fertet máhttit sámegiela, ovtta skandinávalaš gielain ja eaŋgalasgiela njálmmálaččat.
Bálká- ja bargoeavttut
Virgi bálkáhuvvo Stáhta regulatiivva mielde virgekodas 1060 Ossodatdirektevra.
- Bálkkás gessojuvvo 2 % máksu Stáhta penšunkássii
- Buorit loatna- ja penšunortnegat Stáhta penšunkássas
- Buohkaide geat ásset Finnmárkkus ja Davvi-Romssas guoská oahppoloana sihkkunortnet Stáhta loatnakássas 10 % jahkái, gitta 25.000 ru rádjai, ja sierra vearrogeasus
- Dávgasis bargoáigi ja eará buorit čálgoortnegat
Stáhta bargofámus galgá vejolašvuođaid mielde speadjalastojuvvot álbmoga girjáivuohta. Bargiidpolitihkalaš mihttomearrin lea olahit dássedettolaš ahke- ja sohkabealčoahkkádusa, ja dasto rekrutteret olbmuid geain lea sisafárrejeaddji duogáš, doaibmavádjet olbmuid ja geain leat váillit CV:s.
Sámediggi ávžžuha gelbbolaš kandidáhtaid ohcat, beroškeahttá agis, sohkabealis, nationála dahje etnalaš duogážis, doaibmavádjitvuođas dahje váillis CV:s. Sámediggi lea čáhkkilis doaibma (Searvvaheaddji Bargoeallin) ja deattuhat ovttaskas bargiid bargodiliid láhčima.
Virgádeapmi dáhpáhuvvá gustovaš lágaid, njuolggadusaid ja šiehtadusaid mielde.
Virggis lea 6 mánu geahččalanáigi.
Ohcan
Ohcan sáddejuvvo elektronalaččat liŋka bokte "Oza bargui", ja mielde galget biddjojuvvot:
- Ohcanreive
- CV - oahppu ja bargovásihusat fertejit devdojuvvot elektronalaš skovvái
- Oahppo- ja bargoduođaštusat galget biddjojuvvot mielddusin
- Unnimusat guokte referánssa
Almmolašlága §25 mielde sáhttá almmuhit dieđuid ohcci birra vaikko ohcci lea bivdán ahte ii biddjojuvvo ohcciidlistii.
Ohcanáigemearri: Guovvamánu 14. b 2021.
Gulahallan
Lagat dieđuid virggi birra addet:
Lagat dieđut Sámedikki birra
Sámediggi
Sámediggi lea Norgga beale sápmelaččaid nationála álbmotválljen orgána. Sámediggi bargá dan ala ahte sápmelaččat galget beassat ovddidit gielaset, kultuvrraset ja servodateallimeaset. Parlameantavisti lea Kárášjogas.
Sámedikki hálddahusa jođiha direktevra. Hálddahusas leat fágaossodagat ja stábat, ja leat sullii 150 jahkedoaimma. Kánturbáikkit leat Kárášjogas, Vuotnabahta Unjárggas, Guovdageainnus, Almmáivággi Gáivuonas, Romssas, Evenskjer Dielddanuoris, Ájluokta Hábmeris, Árborddis ja Snåases.
Oza bargui
Ohcanáigemearri
Guovvamánu 14. beaivvi 2021