Ovttamielalašvuohta ođđa 2023 duodjeealáhusšiehtadusas

Sámediggi lea boahtán ovttamielalašvuhtii beliiguin Sámiid Duodji ja Duojáriid Ealáhussearvi 2023 duodjeealáhusšiehtadusas. Bealit šadde ovttamielalašvuhtii ahte 2023 obbalašrámmas lea 7,1 miljovnna ruvdno, seammá dásis go 2022 ealáhusšiehtadus.

– Mun lean hui duhtavaš go bealit leat boahtán ovttamielalašvuhtii šiehtadallamis ođđa duodjeealáhusšiehtadusas, dadjá sámediggeráđđi Hans Ole Eira (Gb).

Son lohká ahte ain lea dehálaš vuoruhit duoji ealáhussan ja doaimmaid ovddideamis ja mearkagálvohuksemis. Koronapandemiija ja soahti Ukrainas lea vel eanet oainnusindahkan fitnodagaid dárbbu olahit ođđa márkaniid, ođđa vuovdinčovdosiid ja ođđa vugiid organiseret iežaset doaimmaid.

Sámediggeráđđi cealká Beaiveálgu-julggaštusas ahte duodješiehtadusas berre leat ohcanvuđot doarjja duodjebájiid ja duodjevisttiid háhkamii ja divvumii.

– Dát lea duogáš manne lea biddjon 190 000 ruvnno ođđa ohcanvuđot doarjjaortnegii oktasaš duodjebájiide. Sámediggi oaivvilda ahte láhčit oktasaš duodjebáji maiddái sáhttá leat buorre arena háhkat eambbo duojáriid ealáhussii guhkit áiggi vuollái, dadjá Eira.

Sámediggi háliida ain gulahallama organisašuvnnaiguin ahte movt Sámedikki duodji ealáhussan- mihttu sáhttá olahuvvot ovttasbarggus organisašuvnnaiguin.

Sámedikki dievasčoahkkimis mii lei aitto, áššis 34/22 Duoji ovttasbargu ja organiseren, mearriduvvui oktiičaskit váldošiehtadusa ja ealáhusšiehtadusa ja laktit dán guokte šiehtadusa oktasaš dokumeantan. Dat mielddisbuktá ahte ođđajagimánu 1. beaivve rájes 2024 lea ealáhusšiehtadus ja váldošiehtadus oktasaš dokumeanttas.

– Sámediggi oaivvilda maid ahte livččii vuogas sirdit šiehtadallanáiggiid čavččas giđđii, mii lea vuohkkasit bušeahttaproseassa olis muđuige, loahpaha Eira.

Loga duodjeealáhusšiehtadusa áigodahkii 01.01.2023 – 31.12. 2023 (PDF, 170 kB)

Jus háliidat jearahallat dahje jus leat gažaldagat, váldde oktavuođa sámediggeráđiin Hans Ole Eira (GB), mob. +47 918 61 471, hans.ole.eira@samediggi.no

2022 ja 2023 ekonomalaš rámma šiehtadusa juogadeapmi:

2022 ja 2023 ekonomalaš rámma duodješiehtadusa juogadeapmi:
  Sámedikki 2022 bušeahtta Sámedikki 2023 bušeahtta
Doaibmadoarjja – ohcanvuđot doarjja 2 500 000 2 800 000
Háhkamušat, ovdánahttindoaibma, konsuleantaveahkki, álggahandoarjjaortnet ja prošeavttat – ohcanvuđot doarjja 1 200 000 1 200 000
Duodjestipeanda – ohcanvuđot doarjja 160 000 210 000
Čálgoortnet – ohcanvuđot doarjja 20 000 50 000
Duodjekursa 200 000 110 000
Márkanheiveheapmi/márkanfievrrideapmi – ohcanvuđot doarjja 830 000 500 000
Duojáriid Ealáhus Searvi – njuolggodoarjja 630 000 630 000
Sámiid Duodji – njuolggodoarjja 1 310 000 1 310 000
Fágalaš ja ekonomalaš lávdegoddi – prošeakta 50 000 100 000
Bádji – ohcanvuđot doarjja - 190 000
Duodješiehtadusa organiseren 200 000 -
Submi ealáhusšiehtadus 7 100 000 7 100 000
Almmuhuvvon 20.10.2022 15.24
Maŋemusat rievdaduvvon 21.10.2022 09.30