Sámediggeráđđi lea ožžon ja meannudan BDO raportta maŋŋel dieđiheami ášši Sámedikki direktevrra vuostá.

BDO:a guorahallamiin eai leat gávdnan ahte Sámedikki direktevra lea rihkkon gustovaš njuolggadusaid go lea attesteren dahje dohkkehan rehkegiid dahje geavahan láigobiilla. 

Raporttas leat maid árvvoštallan direktevrra mátkerehkegiid ja erohusaid gaskal ruovttu-bargosaji mátkkiid ja bargomátkkiid. BDO čujuha dasa ahte muhtin mátkerehkegiin lea váilevaččat čilgen ulbmila ja báikki. Dát lea váttásmahttán muhtun mátkkiid árvvoštallama. Raporta ii konkludere ahte direktevra lea noađuhan Sámedikki dainna lágiin ahte golut eai livčče galgan gokčojuvvot bargoaddis. 

Sámediggeráđđi váldá raportta konklušuvnnaid diehttevassii.

Dieđiheapmi, almmolaš beroštupmi áššái ja áigi mii lea mannan dilálašvuođa čielggadeapmái, lea leamaš hui lossat Sámedikki direktevrii. Sámediggeráđđi ádde dan.

Sámediggi áigu čuovvulit raportta ávžžuhusaid ja árvvoštallamiid mat gusket siskkáldas oahpahussii, rutiinnaide ja njuolggadusaid čielggasmahttimii. Dat guoská earret eará duođaštussii mii guoská mátkki ulbmilii i ja mátkkoštanbáikái go mátkkošteapmi registrerejuvvo. 

Sámediggeráđđi háliida maid ásahit fásta ja bistevaš dieđihankanála dieđihemiid várás mat gusket bajimuš hálddahuslaš dássái, ja áššiide main bealátkeahtesvuohta guoská Sámedikki dábálaš dieđihankanálii.