Emma Sofie Joma Rustad oažžu 52 000 kruvnnu doarjaga bearaščájáhussii «Dålle/Dolla». Čájáhusa vuolggasadji leat sámi myhtat ja cukcasat, ja lea erenoamážit heivehuvvon mánáide ja nuoraide. Dat čájehuvvo vuosttaš geardde Gïelevåhkoe/sámi giellavahkkus golggotmánus.
Duottar studio oažžu 100 000 kruvnnu mánáidfilmma dubbemii. Maŋimus jagi lea Duottar Studio dubben máŋga mánáidfilmma sámegillii. Dainna jotket dievaslaččat ja dál lea Oscar-nominerejuvvon filmma "Wolfwalkers" vuorru dubbejuvvot.
Sámi Lávdi - Sámi Association of Performing Arts lea ožžon 70 000 kruvnnu doarjaga interaktiiva installašuvdnii ja performancii «Flokken/Eallu». Prošeakta lei oassi Vårscenefestenis Romssas. Čájálmas lea elliidmáinnas sámi artisttaiguin ja neavttáriiguin geat čuojahit ja nektet dego eallun.
«Passing Through Landscape» lea ovttasbargu gaskkal tekstiila- ja mote- hábmejeaddji Ramona Salo ja lihkadanhábmejeaddji ja lihkastatdáiddára Katarina Skår Lisa. Soai oažžuba 23 000 kruvnnu oasálastimiin iežaska dáiddaprošeavttain Ravnedans Festivalas Kristiansandas dán geasi.
Ingunn Svanes Alvedal lea ožžon 150 000 kruvnnu čájálmasprošektii «We come from the other side», mii čájehuvvo Palais des Nations Genèves International Academy of Ceramicsa 50. kongreassas «Melting Pot» čakčamánu gaskkamuttus.
– Mun lean ilus go Sámediggi beassá doarjut sámi kultureallima stuorra máŋggabealatvuođa. Dát lokte min kultuvrra, ja addá sihke sápmelaččaide ja earáide buriid vásáhusaid, lohka sámediggeráđđi Maja Kristine Jåma (NSR).
Doarjja golmma konsertii
Sámediggeráđđi lea maid juolludan 145 000 kruvnnu doarjaga golmma konsertii sámi musihkkáriiguin. Suortta Jazz ja viseklubb ja Romssa riikkaidgaskasaš girkofestivála ožžot 25 000 kruvnnu doarjaga guhte ge, ja Saemien Studeenth Tråantesne leat ožžon 95 000 kruvnnu lágidit konseartta Jijjen Tjakttjen Tjåaghkoes, mii lágiduvvui borgemánus.
Suortta Jazzfestivála lea bálkáhan musihkkára Frode Fjellheima ovdanbuktit musihka su almmuhemiiguin Aejlies Gaaltije ja Biejjien Vuelie, ja lassin vel ođđa musihka. Fjellheimas lea juoigi Ulla Pirttijärvi ja soprána Adrian Angelico mielde. Festivála lágiduvvo čakčamánu 20.-24. beaivvi.
Musihkar Georg Buljo ovttas Nidarosdomen oratorie- koarain čájehit bihttá diŋgojuvvon buktagis «Kalvskinnsangen» George Buljo bokte, Romssa riikkaidgaskasaš girkofestiválas golggotmánu 29.beaivvi 2022.
– Sámi musihkkarat leat bivnnuhat, ja ohcaluvvojit máŋgga sajis. Dássi mii čájehuvvo iešguđetlágan festiválain ja konsearttain movttiida vel eanet sámi luođi ja musihka buvttadit, dadjá Jåma.
Juolludeamit juolluduvvojit doarjjaortnegis Kulturdoaimmat.
Gažaldagaid dahje jearahallama addá sámediggeráđđi Maja Kristine Jåma (NSR),tlf: +47 47 24 23 66, maja.kristine.jama@samediggi.no
Kulturdoaimmaid doarjjaortnega juolludemiid oktiigeassu:
70 000 kr Sámi Lávdi Sámi Association of Performing Arts elliidmuitalussii «Flokken/Eallu»
52 000 kr Emma Sofie Joma Rustad’ii bearaščájálmassii «Dålle/Dolla»
23 000 kr Katarina Skår Lisai dáiddaprošeavttain «Passing Through Landscape» Ravnedans- Festiválas dálááiggedánssain Kristiansandas suoidnemánu 6.b. 2022.
150 000 kr Ingunn Svanes Alvedalii čáláhusprošektii «We come from the other side»
100 000 kr Duottar studio ASii «Wolfwalkers» dubbemii
95 000 kr Saemien Studeenth Tråantesneii Jijje @Tjaktjen Tjåanghkoe
25 000 kr Suortá Jazz ja viseklubbii, konsertii Frode Fjellheimaim ovttas Ulla Pirttijärviin, Adrian Angelico ja joavku
25 000 kr Romssa girkoakademiijai konsertii Romssa riikkaidgaskasaš girkofestiválii: Georg Buljo ovttas Nidarosdomens oratoriekoarain.