Mikkel Eskil Mikkelsen Vaino Rensberg/Sametinget  Sámediggi lea juolludan 300 000 kruvnnu NTEC MEDIA AS prošektii «Julevbágo 3» mii lea joatkkabargu ovdánahttit «Julevbágo». Ulbmil lea viiddidit julevsámegiel digitála sátnegirjji Julevbágo oktasaš sátnegirjin buot sámegielaide, dáinna digitála veahkkereaidduin galgá šaddat álkit gávdnat ja ohcat sániid. NTEC MEDIA AS áigu fállat eanet giellareaidduid sámegiel geavaheddjiide, ja dakkár mii lea geavaheaddjiláđis.

– Sámediggi lea movttet go dakkár digitála giellareaidu almmuhuvvo, ja áinnas go dalle addá geavaheddjiide vejolašvuođa álkibut gávdnat sániid sátnegirjejuŋgelis, lohká sámediggeráđđi Mikkel Eskil Mikkelsen (NSR).

Juolludeapmi juolluduvvo doarjjaortnegis: Dokumenterendoaimmat.

Loktet sámegiela mánáid ja nuoraid gaskkas

Sámediggi lea juolludan 300 000 kruvnnu doarjaga Ravn Studio AS prošektii «Flåklypa oassi 2». Flåklypa speallu almmuhuvvui skábmamánu 2021s, ja dát speallu lea bures vuostáiváldon mánáid ja nuoraid gaskkas. Dál áigot almmuhit Flåklypa spealus nuppi oasi mii lea davvisámegillii.

– Sámedikki strategiija lea ge loktet sámegiela mánáid ja nuoraid gaskkas, ja dakkár digitála spealut leat dehálaččat, lohká Mikkelsen.

Juolludeapmi juolluduvvo doarjjaortnegis: Giellaovddidandoaimmat.

Artihkalprošeakta julevsámi fitnodatálggaheddjiid birra

Sámediggi lea maiddái juolludan 190 000 kruvnnu NuorttaSálto áviisa artihkalprošektii julevsámi fitnodatálggaheddjiid birra.

Ulbmil artihkalprošeavttain lea čalmmustahttit ja diđolažžan dahkat dehálaš oasi julevsámegielas, kultuvrras ja servodateallimis mii ii ovdal leat čalmmustahttojuvvon. Earenomášvuohta lea ahte dát fitnodatálggaheaddjit álggahedje fitnodagaid ja bargosajiid julevsámi guovlluide, ja bargit dáin fitnodagain ledje eanas sápmelaččat.

– Sámediggi atná dehálažžan ahte sihke dálá ja maiddái boahtte buolvvaide muitaluvvo julevsámi fitnodagaid ja fitnodateaiggádiid birra, lohká Mikkelsen.

Juolludeapmi juolluduvvo doarjjaortnegis: Sierra gielladoaimmat julev-, lulli- ja márkosámi guovlluide.

Gažaldagaid dahje jearahallama addá sámediggeráđđi Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no