Giellavahku oktavuođas Sámediggi fuomášuhttá olbmo, joavkku, doaimmahaga dahje organisašuvnna mii lea vuohkkasit geavahan ja čalmmustahttán sámegiela iežas beaivválaš doaimmas. Sámedikki giellaloktenbálkkašumi vuoiti oažžu 30 000 ruvnno ja dáiddadiploma. Dáiddadiploma lea Marte Somby ráhkadan.
Sámediggeráđđi lea mearridan addit giellaloktenbálkkašumi 2022 Lemet-Jon Aagii, Aage Ragnar Solbakkii.
– Háliidan giitit dan barggu ovddas maid Lemet-Jon Aage lea bargan gaskkustit árbevirolaš giela ja máhtu johkasámi eallinvuogi birra Deanuleagis, ja sávan lihku bálkkašumiin, dadjá sámediggepresideanta Silje Karine Muotka (NSR).
Historihkkár Aage Solbakk.
Sametinget/Vaino Rensberg
Aage lea olu jagiid bargan sámegiela ovdánahttimiin sihke árbevirolaš bargguid ovddideamis ja fágagirjjiid almmuhemiin. Son lea vuoruhan sámi servodahkii juohkit fágalaš dieđuid sámegillii. Sámedikki dieđuid mielde son lea leamaš mielde birrasiid 200 girjji ja artihkkala almmuheamis, eanas dain davvisámegillii. Aage lea historihkkár ja lea ovdamearka dihte čállán sámi čállingiela historjjá birra. Son lea maid olu giellafágalaš bargguid bargan, ovdamearkka dihte báikenamaid čohkken, árbevirolaš bargguid sátneriggodaga dokumenteren ja gaskkusteapmi.
Aage lea riegádan jagis 1943 Fanasgiettis. Son lea bajásšaddan ja eallán Deatnogáttis olles eallima, ja lea oahppan árbevirolaš luossahálddašeami ja luossabivddu mánnávuođa rájes.
– Bargguidis bokte son lea čájehan dan giellariggodaga ja máhtu luosa birra mii árbevirolaš luossabivddus ja luossahálddašeamis lea. Son lea čohkken, dokumenteren ja gaskkustan sátneriggodaga luosa, bivdobáikkiid, báikenamaid ja árbevirolaš luossahálddašeami birra, dadjá Muotka.
Sámedikki giellaloktenbálkkašupmi geigejuvvo Snåases sotnabeaivvi golggotmánu 23. beaivvi, Giellavahku ja álgoálbmotgielaid logijagi (IDIL) rahpandoaluin. Sámediggepresideanta Silje Karine Muotka ja ráđđelahtut Mikkel Eskil Mikkelsen ja Maja Kristine Jåma oassálastet rahpamis.
Eanet dieđut rahpandoaluid birra: https://sametinget.no/Kalender/CalendarEvent.aspx?Id=633&MId1=7