– Lea hui buorre go Sámediggi oažžu 20 miljovnna ruvnno lassin. Mun háliidan giitit bellodaga SG go sii duođai leat áŋgiruššan dán lasáhusa ovddas bušeahttašiehtadallamiin, dadjá sámediggepresideanta. 

Sámediggi lea čujuhan mo Sámediggi ja sámi servodat lea bázahallan ruđalaččat go stádabušeahtta almmuhuvvui gieskat. 

– Dát lassáneapmi addá midjiide vejolašvuođa earret eará gokčat veaháš dan bázahallama maid oaidnit sihke sámi ásahusain ja Sámedikki ohcanvuđot ortnegiin, dadjá sámediggeráđđi Runar Myrnes Balto (NSR), geas lea ovddasvástádus bušeahtas. 

Sámedikki dievasčoahkkin meannuda 2024 bušeahta juo gaskavahku juovlamánu 6. beaivvi. 20 miljovnna ruvdnosaš lasáhus juhkkojuvvo geassemánu 2024 reviderejuvvon bušeahtas. 

– Mii dárbbašat eanet go badjelaš guokte beaivvi áššemeannudit 20 miljon ruvdnosaš lasáhusa dohkálaš vuogi mielde. Danne mii árvalit ahte dát dahkkojuvvo go mii ođasmahttit bušeahta ovdal geasi boahtte jagi, dadjá Myrnes Balto. 

Bušeahttasoahpamušas lea maid mielde 17 miljovnna ruvdnosaš lasáhus álbmotdearvvašvuođaiskkadeapmái Saminor 3 ja 7 miljovnna ruvdno Sámi allaskuvlii. 

-Mii leat hui ilus dan ovddas. Saminor 3 lea deaŧalaš iskkadeapmi mii addá eanet máhtu álbmotdearvvašvuođa birra Sámis ja Sámi allaskuvla dahká deaŧalaš barggu sihkkarastit gelbbolašvuođa maid sámi servodat dárbbaša, loahpaha Myrnes Balto.