Dán jagi álggahuvvo Riikkaidgaskasaš logijahki eamiálbmotgielaid váste 2022-2032 (The International Decade of Indigenous Languages, IDIL2022-2032), maid UNESCO jođiha ovttas eamiálbmogiiguin ja stáhtaiguin. Giellalogijagi ulbmilin lea fuomášuhttit eamiálbmogiid gielladiliid, ja mobiliseret eiseválddiid ja earáid gáhttet, ealáskahttit ja ovddidit eamiálbmotgielaid.

UNESCO lea ovttas eamiálbmotservvodagaiguin ja stáhtaiguin hábmen oktasaš globála doaibmaplána giellalogijahkái, mas okta váldočuoggáin lea ahte giellateknologiija galgá leat olámuttus maiddái eamiálbmotgielaide.

Norgga, Ruoŧa ja Suoma beale sámedikkit leat válljen ovttas čuovvulit giellalogijagi. Sámedikkit leat lágidan oktasaš bargobáji ja seminára, ja boađusin lei earret eará dat, ahte sámi giellateknologiija ferte nannejuvvot.

– Dán áššis lea hui lunddolaš ovttasbargat Suoma ja Ruoŧa beale sámedikkiiguin, go giella han lea min oktasaš árbi, boahtteáigi ja ovddasvástádus. Lean hui ilus go mis lea leamaš nu buorre ovttasbargu dán áššis, mii čájeha ahte buohkain lea duohta hállu ja dáhttu ovddidit min gielaid, ja láhčit buori gielladili boahttevaš buolvvaide, dadjá Mikkelsen.

Sámedikkit leat hábmen oktasaš dievasčoahkkinášši «Mijá tekno – Sámedikkiid oktasaš njunušprošeakta IDIL2022-2032 oktavuođas», maid norgga beale Sámediggi meannuda boahtte vahku dievasčoahkkimis. Sámedikkit háliidit nannet sámi giellateknologiija ja sámi giellateknologiijabirrasa.

Sámedikkit eaktudit maiddái stáhtaid čuovvulit ášši, ja ovttas sámedikkiiguin ovddidit gáibádusaid earret eará stuorra teknologiijafitnodagaide. Sámediggeráđđi Mikkel Eskil Mikkelsen illuda meannudit ášši dievasčoahkkimis.

– Giellateknologiija ovdána johtilit, ja giellateknologiija lea juoga maid buohkat geavahit measta beaivválaččat. Dattege giellateknologiija ii leat seamma bures olámuttus eamiálbmotgielaide. Duohtavuohta lea dat, ahte gielat mat eai beasa mielde giellateknologiijabárrui, sáhttet oalát jávkat. Min bargun dál lea loktet sámi giellateknologiija ja ovddidit min dárbbuid ja gáibádusaid, vai sámegielat sáhttet bissut ealli ja ođđaáigásaš giellan. Seammás mii háliidit láhčit dili ja doaibmat ovdavázzin eará eamiálbmogiidda, lohká Mikkelsen.

Ášši 41/22 Mijá tekno – Sámedikkiid oktasaš njunušprošeakta IDIL2022-2032 oktavuođas meannuduvvo dievasčoahkkimis duorastaga, golggotmánu 13. beaivvi.  

Gažaldagaid vástida dahje jearahallama addá sámediggeráđđi Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no

Áššebáhpirat:

https://innsyn.onacos.no/sametinget/mote/samisk/wfinnsyn.ashx?response=journalpost_detaljer&journalpostid=2021068147&