Mikkel Eskil Mikkelsen Vaino Rensberg/Sametinget  Dán vuoro addui doarjja oahpponeavvuide dáin fágasurggiin; julevsámegiella nubbingiellan, fágaidrasttideaddji fáddái guoddevaš ovdáneamis, matematihkkafágii davvisámegillii ja programmeremii vuođđoskuvlla dásis.

Dál álgá bargu ráhkadišgoahtit digitála oahpponeavvu guoddevaš ovdáneami birra, mii lea fágaidrasttideaddji fáddá ja gokčá olles dan 13 jagi skuvlamannolaga.

– Oahppoplánat maidda dát oahpponeavvu láktasa leat fágat; sámegiella, servodatfága, luonddufága, ROEE, biebmu ja dearvvašvuohta, duodji ja musihkka. Dál juo sáhttit muitalit ahte guovtte jagi geahčen besset sámi oahppit geavahišgoahtit oahpponeavvu man mii vuordit gealdagasas, dadjá sámediggeráđđi Mikkel Eskil Mikkelsen (NSR).

Matematihkka fágas ja eará fágain vuođđoskuvladásis lea vuordámuš ahte ohppiin galget leat digitála gálggat. Oahppit fertejit máhttit programmerema bokte suokkardit ja čoavdit matematihkalaš čuolmmaid.   

– Lea dehálaš ahte sámi oahppit ohpet programmerema iežaset gillii. Dákkár oahpponeavvu ii gávdno ovdalaččas sámi skuvllain ja danin lean ilus go mii leat beassan juolludit doarjaga ohcamii mii deavdá dárbbuid dán fágasuorggi golmma sámegillii, dadjá Mikkelsen.

Sámediggeráđđi lea maid vuhtii váldán daid dárbbuid mat leat sámegielat oahpaheddjiin ja sii leat ge ovddidan makkár fágain leat unnán oahpponeavvut. Danne addo doarjja maid ráhkadit lávllagirjji julevsámegillii mii heive sihke musihkka- ja giellafágii.

Davvisámegiela vuosttašgiella fágas juolludii ráđđi maid doarjaga davvisámegiel teakstačoakkáldahkii gaskadássái, mii movttiidahttá eanet lohkamii, nanne giellaoahppama ja lea hui ávkkálaš danne go teakstahivvodat dáidda jahkedásiide lea vánis ja váilevaš.

For intervju eller spørsmål, kontakt sametingsråd Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no