– Juohke čavčča lea dárbu sirddašit ruđa bušeahtas. De čielgagohtet rehketdoallologut, ja mii oaidnit gokko lea unnit adnojuvvon go mii lei bušeahtas. Sámediggeráđi bargovuohki lea sirdit ruđa poasttaide nu ahte ruhta jođánit boahtá buorrin min servodahkii, dadjá Myrnes Balto. 

2023 čavčča lea máŋgga ohcanvuđot ortnegii lasihuvvon ruhta. Earret eará lea addojuvvon 3 miljovnna ruvnno lasáhus doarjjaortnegii mariidnaealáhusat, mas earret eará sáhttá oažžut doarjaga guolástanfatnasa ja bargoreaidduid vuosttaš gearddi oastimii. 

- Sámediggi lea dehálaš doarjjaaddi sámi guovlluid guolástussii, ja mun illudan go mii dán jagi leat nagodan lasihit ortnegii beali eambbo ruđa. Dat ollu ohcamat čájehit ahte mis dát ortnet lea dehálaš ja doaibmá ulbmila mielde, dadjá sámediggeráđđi Myrnes Balto. 

Investerendoarjja kulturásahusaide Sámediggeráđđi lea maiddái addán investerendoarjaga buot sámi museaide, lassin Sámi Dáiddaguovddážii. Dat ožžot guhtege 400.000,- ruvnno, earret RiddoDuottarMuseat ja Deanu ja Várjjat Museasiida, mat goabbáge oažžuba 800.000,- ruvnno. 

- Mii diehtit ahte sámi museain leat stuora investerendárbbut, ja ahte dat ožžot beare unnán ruhtadeami dáčča sullasaččaid ektui. Danne lean hui movttet go sáhttit dáinna ruhtasirdimiin sidjiide addit vejolašvuođa investeret dan maid dárbbašit, dadjá sámediggeráđđi Maja Kristine Jåma (NSR), geas lea ovddasvástádus kulturáššiin. 

Dasa lassin addojuvvo 3 miljovnna ruvnno Beaivváš Sámi Teáhterii ja geavaheaddjidávviriid oastimii ođđa vistái masa fárrejit 2024 geasi. 

– Mii leat dáhkidan dasa 15 miljovnna ruvnno, ja dáinna sirdimiin leat lagabus ollašuhttit dan, dadjá Jåma. 

Sámediggeráđđi lea sirdán ruđa ollu ohcanvuđot ortnegiidda, earret eará giellaovdánahttindoaimmaide, stipeanddaide, mánáidgárddiide, vuoigatvuođaide, vuođđoealáhusaide, iešguđet kulturdoaimmaide, regionála ovddideapmái ja dearvvašvuođa- ja sosiálaprošeavttaide. Dáidda ortnegiidda lea lasihuvvon oktiibuot 16,4 miljovnna ruvnno.

Geahča buot sirdimiid 2023 bušeahtas. (PDF, 254 kB)