Presideantta dearvvuođat Sámiráđi 22. sámekonferánsii Jielleváris

Presideantta dearvvuođat Sámiráđi 22. sámekonferánsii Jielleváris

Sámediggepresideantta Silje Karine Muotka dearvvuođat Sámiráđi guoktegoalmmatlot sámekonferánsii Jielleváris/Váhčiris, mii lea borgemánu 10-14 beaivvi, 2022. 

Ráhkis buohkat!

Giitu go beasan dearvvahit Sámiráđi sámekonferánssa. Lea illudahtti beassat deaivvadit fas. Vaikke váillahit ge min Ruošša vieljaid ja oappáid. Dat čájeha movt min stáda dilit váikkuhit min eamiálbmogiid eallimii.  

Norgga Sámedikkis ja Sámeráđis lea álo leamaš lagas ja buorre ovttasbargu. Sihke ruovttubargguin ja riikkaidgaskasaš bargguin.

Sámi servvodat dárbbaša nana ásahusaid ja nana jienaid. Mii geat ovddastit demokráhtalaš ja ovddasteaddji ásahusaid, Sámedikkiid - dárbbašit maid nana siviilaservvodaga ja gievrras organisašuvnnaid min searvái.

Mii dárbbašit siviilaservvodaga mii bargá ja ovddida sámi áššiid, iehčanassii dahje Sámedikkiiguin ovttas. Ja áinnas dárbbašit oaiviladdi ja dávisteaddji siviilaservvodaga ja organisašuvnnaid.  

Sámiráđi guhkes historjjáin, govda árvobáhpiriin ja čanastumiin sámi servvodahkii, de sáhttit roahkka dadjat ahte Sámiráđđi lea deháleamos oppasámi organisašuvdna sámi siviilaservvodagas.

Sámiráđi bargu ii leat dušše sámi álbmogii leamaš dehálaš, maid eamiálbmogiidda miehtá máilmmi. Máŋggaid logijagiid lea Sámiráđis leamaš guovddáš rolla eamiálbmogiid vuoigatvuođaid ovddideamis ON:as ja Árktalaš Ráđis. Sámiráđđi lea juo buori muttus strategalaš bargguin EU ektui, ja dan birra galgat eambbo gullat ihttin.

Háliidan ovddidit Sámiráđi rolla stuorimus globála hástalusa čoavdinbarggus min áiggis - dálkkádatroasuin.

Dálkkádatroassu čuohcá midjiide eamiálbmogii erenoamáš garrasit. Dasa lassin lea mis luondduroassu. Dat čuohcá min eallinvugiide ja min luondduriggodagaide.

ON:a luonddupanela čájeha dattetge juoga buori - biologalaš šláddjivuohta lea buoremusat fuolahuvvon eamiálbmotguovlluin. Dat ii leat soaittáhagas. Mii eallit lagas oktavuođas ja sorjavašvuođas luondduriggodagaide mat birastahttet min. Mii sápmelaččat, mii leat spesialisttat iežamet guovlluin ja birrasiin.

Danne lean giitevaš go Sámiráđđi lea juolludan Gunn-Britt Rettera čehppodaga go su leat luoitán eamiálbmotvuođđovuogádahkii riikkaidgaskasaš dálkkádatšiehtadallamiidda. Viidáset lea Sámiráđđi, Norgga Sámedikki ovddas, áigon ráhkadit dálkkádatraportta.

Mis lea dárbu áicat, duođaštit ja vel gaskkustit dan mii dáhpáhuvvá min guovlluin. Dán oktavuođas lea min máhttu mearkkašahtti. Dálkkádatraportta bargu vuođđuda dálkkádatseminára mii dollojuvvo maŋŋelaš odne, ja mun illudan searvat seminárii.

Dán jagaš sámekonferánssa fáttá lea "empowering Sápmi". Go nanne Sámi, de nanne maid min vejolašvuođaid doaimmahit min iešmearridanrievtti álbmogin. Dat nanne ovttaskasolbmuid ja min servvodaga vejolašvuođaid ieža hálddašit min resurssaid, kultuvrra ja ealáhusaid.

Sámekonferánssas Åres ovccinuppelotčuođi gávccilogiguđas mearriduvvui sámi leavga. Leavggas lea leamaš vearditmeahttun árvu ja lea "empowered” Sámi máŋgga ládje. Dán jagáš sámekonferánssas galgá sámi nationála luođi evttohus meannuduvvot. Dat lea ođđa vejolašvuohta "empower" Sámi.

Sávan Sámiráđđái, sáttaolbmuide(delegáhtaide) ja buot gussiide lihkku konferánssain!

Giitu!