Vuosttažettiin dás álggedettiin, de háliidan buohkaide sávvat lihkku otná beivviin.
Odne ávvudat mii Ovttastuvvan Našuvnnaid riikkaidgaskasaš álgoálbmotbeaivvi. Dá lea dat beaivi goas mii fuomášuhttit máilmmi álgoálbmogiid, ja odne leat guovddážis leat sihke gudnejahttimat, solidaritehta ja min vuoigatvuođat.
Ollu álgoálbmogat ellet hui váttis diliin ja sidjiide čuhcet doaimmat ja áššit mat dagahit sin diliid váttisin, eai ge beasa eallit ja ovdánit daid eavttuid vuođul mat leat mearriduvvon ON julggaštusas álgoálbmogiid vuoigatvuođaid birra.
Odne háliidan čalmmustahttit min doaimmaid ja hástalusaid mat gusket dálkkádahkii ja biebmovuogádagaide.
Dálkkádatrievdan čuohcá erenomáš garrasit álgoálbmogiidda ja dát lea maid oassin hálddašeamis ja luondduriggodagaid geavaheamis. Riikkaidgaskasaš Luonddupanela raporta jagis 2019s čájeha mo biologalaš máŋggabealatvuođa lea buoremusat seilon álgoálbmotguovlluin.
Dát ii leat dáhpedorpmis. Mii eallit ja leat eallán luonddus, ja luondduvalljodagat han leat ge dehálaš oassin min guovlluin.
Danin lea mu mielas dehálaš ahte álgoálbmogat ieža hálddašit luondduvalljodagaid, ja nu sáhttit ge buoremusat iežamet áimmahuššamiin bidjat buoret vuođu, sihke guolásteamis, bivddus, bivdokultuvrras, muorječoaggimis ja guohtundiliin.
Maiddái dáppe Norggas leat mis dálá áiggis ovdamearkkat mo stáhtahálddašeamis eahpelihkostuvvet. Máŋggas leat dán geasi vásihan ahte eai beasa luosaid bivdit, nu mo lea sin árbevierrun. Olahan dihte buoret biebmosihkkarvuođa, de oaivvildat mii ahte mis ferte leat eanet fápmu luondduriggodagaid hálddašeamis ja riektevuođđu ferte leat oadjebas.
Ii ovttasge earáin - go mis leat seamma nana gelbbolašvuohta ja dáhttu ceavzilisvugiiguin hálddašit luondduvalljodagaid, ja sihkkarastit birgejumi boahttevaš buolvvaide.
Danne lean duhtavaš go Ovttastuvvan Našuvdna iežaset máilmmidási biebmoorganisašuvnnas, FAOas, dál bidjet fuomášumi Davviguovllu álgoálbmogiid biebmovuogádagaide. Dán doibmii háliida nai Sámediggi searvat.
Álgoálbmogiid árvvut ja gelbbolašvuohta sáhttet buktit buoret čovdosiid, mat eai leat ávkin dušše álgoálbmogiidda, muhto maiddái buohkaide earáide.
Sávan buohkaide lihkku máilmmi álgoálbmogiid beivviin!