Sámediggepresideanta Silje Karine Muotka (NSR) nammada Oskal Máhte Ántte Elle Nils Ántte – Nils Ante Eira (Gb) ođđa politihkalaš ráđđeaddin. Eira álgá virgái odne borgemánu 30. beaivvi 2023. 

Nils Ante Eiras lea vásáhus ja máhttu sihke sámi politihkas ja servodateallimis, ja dovdá maiddái Sámedikki bures. Son lea leamaš várrelahttun Sámediggái guokte áigodaga (2013-2017 ja 2017-2021) ja lea maid bargan Sámedikki hálddahusas áigodagas 2005-2008. Eira ássá Loabágis, gos bargá bohccuiguin ja sámegieloahpaheaddjin.

– Sus lea nana duogáš earret eará boazodoalus ja oahpahussuorggis, ja doaivvun son šaddá stuorra resursan sámediggeráđđái. Dáinna nammademiin šaddá son buorren doarjjan politihkalaš jođihangoddái, go sus lea dehálaš máhttu mii boahtá ávkin midjiide, dadjá sámediggepresideanta Silje Karine Muotka (NSR).

Ođđa doaimmas politihkalaš ráđđeaddin galgá Eira bargat iešguđetlágan dehálaš fáttáiguin, nu mo boazodoalu, borasspirepolitihka, eanandoalu, areála- ja johtalusguoski áššiiguin, ja árbevirolaš máhtu, girkopolitihka, giela ja oahpahusa áššiiguin.

– Buot dát leat guovddáš áššit sámi servodagas, mat gáibidit sihke beroštumi ja gelbbolašvuođa, Dan dihte lean ilus go Nils Ante Eira lea miehtan dohppet dán hástalusa ja mun illudan ovttasbargat suinna, dadjá Muotka.

Nils Ante Eira illuda álgit politihkalaš ráđđeaddin ja váldit oasi sámi servodaga viidáset ovdánahttimii.

– Šaddá hirbmat gelddolaš bargat sámediggeráđi politihkalaš ráđđeaddin, ja illudan bargat áššiiguin mat leat mu váimmu lagamusas buorrin Sápmái, dadjá Eira.