Sámedikkis lea fásta virgi ja ohcet movttiideaddji ja analyhtalaš ráđđeaddi áidduásahuvvon Doaibmastivrema ja servodatoktavuođa stábii. Stába mihttu lea sihkkarastit ahte Sámedikki doaibma lea ovttastahttojuvvon, koordinerejuvvon ja beaktil. Stábii gullá earret eará jođihit prošeavtta Duohtavuođa- ja soabadankommišuvnna raportta Sámedikki čuovvoleapmi. Virgi šaddá leat guovddážis Sámedikki bušeahttabargguid oktavuođas.

Dál lea rahpasan vejolašvuohta dutnje gii dáhtot strategalaččat bušeahtain bargat nannedettiin Sámedikki. Mii leat ohcamin du, gii liikot ekonomiijii, bušeahttabargguide ja doaibmastivrejupmái.

Ráđđeaddi – Bušeahtta ja guorahallan galgá veahkkin doaimmahit Sámedikki servodatdoaimma vai Sámediggi juksá bajitdási mihttuidis. Bargguide gullá ráhkadit Sámedikki bušeahta lagaš ovttasbargguin politihkalaš jođiheddjiiguin ja jođihanjoavkkuin, lassin čađahit ekonomalaš guorahallamiid Sámedikki rehketdoalu vuolggasajis. Ráđđeaddi – Bušeahtta ja guorahallan galgá joatkevaččat veahkehit hábmet Sámedikki stivrenmihttuid ja doarjut jođihanjoavkku Sámedikki ollislaš doaibmastivrejumis, ja lassin leat doarjjan siskkáldasdárkkisteamis. Bargu sisttisdoallá plánema sihke jagi badjel ja máŋgga jagi badjel geahčasteamis.

Sámedikkis leat olu kántorbáikkit maid gaskkas sáhtát válljet, ja don sáhtát bargat kántorbáikkis gos leat guoros kántorlanjat. Juste dál leat mis guoros kántorlanjat Kárášjogas, Guovdageainnus, Vuonnabađas, Aarbortes, Skániin, Snoasas, Romssas ja Ájluovttas.
Sámedikki bargit fertejit rehkenastit veahá mátkkoštit.

Barggut

Doaibmastivrema ja servodatoktavuođa stába ráđđeaddin šaddet dus leat čuovvovaš barggut:

• Ráhkadit ja čuovvulit Sámedikki bušeahta ovttas stábain, politihkalaš jođiheddjiiguin ja fágaossodagaiguin.
• Juohke kvartálas doaimmahit ekonomalaš guorahallamiid jođihanjovkui
• Veahkehit Sámedikki controllera siskkáldasdárkkistemiin
• Veahkehit ovdánahttit ja čuovvulit stivrenparamehteriid
• Doarjut strategalaš stivrema ja guhkesáigge plánemiid
• Veahkehit háhkat diehtovuođu mearrádusaide ja politihkalaš ovdáneapmái

Du bargobeaivi hábmejuvvo dárbbuid mielde ja du gelbbolašvuođa mielde. Fertet rehkenastit ahte virggi ja juhkosa barggut ja ovddasvástádussuorggit rivdet ásahusa dárbbuid mielde.