Bargun lea ovdánahttit Sámedikki dáidda- ja kulturpolitihka ja čuovvolit dan ovttasbarggu, šiehtadusaid, proseassaid ja prošeavttaid bokte sámi, regionála ja nationála ásahusaiguin ja organisašuvnnaiguin. Virgi heive dutnje gii dovddat ja háldiidat bargat lávga sámi dáidda- ja kultursurggiin joatkindihte dan positiivvalaš ovdáneami mii suorggis lea.  

Sámedikkis leat olu kántorbáikkit maid gaskkas sáhtát válljet, ja don sáhtát bargat kántorbáikkis gos leat guoros kántorlanjat. Juste dál leat mis guoros kántorlanjat Kárášjogas, Guovdageainnus, Vuonnabađas, Aarbortes, Skániin, Snoasas, Romssas ja Ájluovttas.

Sámedikki bargit fertejit rehkenastit veahá mátkkoštit.

Barggut

Ráđđeaddin/seniorráđđeaddin leat dus čuovvovaš barggut:   

• Rávvet, áššemeannudit ja čielggadit fágasuorggi mii váikkuha sámi kultur- ja servodatovdánahttimii.  
• Čuovvut mielde mii dáhpáhuvvá fágasuorggis, ja leat mielde ovddideame fágasuorggi dainna lágiin ahte aktiivvalaččat ohcat máhtu, analyseret ja juogadit ipmárdusa politihkalaš, servodatlaš ja fágalaš ovdáneamis.  
• Addit fágalaš cealkámušaid, guorahallamiid ja rávvagiid siskkáldas politihkkaovddideami oktavuođas.  
• Koordineret ovdánahttinbarggu, bagadit sihke kollegaid ja earáid servodagas. 
• Veahkkin ovdánahttit ja váldit adnui ođđa bargovugiid, sihke mii guoská bargometodaide ja bargoneavvuide.  
• Gulahallat ja ovttasbargat fágasuorggi gullevaš aktevrraiguin. 
• Veahkehit ja jođihit fágasuorggi gullevaš čielggademiid, dievasčoahkkináššiid ja prošeavttaid. 

Du bargobeaivi hábmejuvvo dárbbuid mielde ja du gelbbolašvuođa mielde. Fertet rehkenastit ahte virggi ja juhkosa barggut ja ovddasvástádussuorggit rivdet ásahusa dárbbuid mielde.

Loga eanet virggi birra ja oza virggi Karrieresiiddus