– Ráđđehus lohpidii sápmelaččaide sámi kulturloktema ja nana barggu sámegielaid ovddas. Dál oaidnit ahte rihkku dan lohpádusa, go dát stáhtabušeahtta lea ráđđehusa maŋemus. Dat lea hui váidalahtti, ja mearkkaša ahte mii eat veaje maidege dahkat sámi giella- ja kulturdoaimmaid váilevaš ruhtadeami olis, dadjá sámediggeráđđi Runar Myrnes Balto (NSR).

Myrnes Balto maiddái čujuha dasa ahte ráđđehus lea lohpidan ruđa sámi ealáhusdoaimmaid geaidnokártta čuovvoleapmái, man ráđđehus ieš lea vuolggahan.

– Dan birra iige šat oidno gostege. Dat ii gal fávdnádit hukse luohttámuša, dadjá Myrnes Balto.

Sámediggeráđđi dasto váldá ovdan paradoksa ráđđehusa sámepolitihkas.

– Dat bidjet sámi ealáhusdoaimmaheddjiid garra deattu vuollái go plánejit energiijahuksemiid ja mineráladoaimmaid. Seammás ii oaččo Sámediggi eaige vuoigatvuođalaččat resurssaid gieđahallat daid áššiid. Buot dát oktiibuot orru leamen duođalaš fápmogeavaheapmi. Dat lea hui heittot dál vel go stuoradiggi lea meannudeame Duohtavuođa- ja soabadankommišuvnna raportta, dadjá Myrnes Balto.

Dan dihte bidjá dál Sámediggi luohttámušas ráđđehusbellodagaid bušeahttabeallái Sosialisttalaš gurutbellodahkii (Sg), mii ovdal lea bušeahttašiehtadallamiin vuoruhan sámi áššiid.

– SG lea ovdal čájehan ahte sii vuoruhit sihke Sámedikki ja eará sámi doaimmaid bušeahttašiehtadallamiin, ja mun doaivvun ahte sii dahket dan fas, loahpaha Myrnes Balto.

Loga eanet dás: Beregning (PDF, 75 kB)

Loga Sámedikki cealkámuša ráđđehussii jagi 2026 stáhtabušeahta birra: Sámediggi bivdá eanet doarjaga njulget dáruiduhttima váikkuhusaid