Almmustahttimis mii lei Romssa girjerájus ja gos ledje dievva geahččit, ovdanbuvttiiga stáhtaministtar Jonas Gahr Støre ja kultur- ja dásseárvoministtar Lubna Jaffery plána. Sámediggepresideanta lei almmustahttimis ovttas sámediggeráđiin Runar Myrnes Baltoin ja politihkalaš ráđđeaddiin Sandra Márjá Westain.

Silje Karine Muotka ja/og Runar Myrnes Balto Ørjan Marakatt Bertelsen

– Sámediggi almmustahtii iežas doaibmaplána sápmelaččaid cielaheami vuostá 2022:s, mas gáibideimmet ahte ráđđehus ráhkada seammasullasaš plána. Duohtavuođa- ja soabahankommišuvdna nai doarjjui dan gáibádusa. Ráđđehus lea čuovvolan dan dál, ja dat lea vuoitun midjiide buohkaide! Sápmelaččaid vealaheami ja cielaheami eastadeapmi lea nationála ovddasvástádus, ja illudahttá go ráđđehus váldá dan duođalaččat, dadjá sámediggepresideanta Silje Karine Muotka.

Deaŧalaš vuoittut sámi vuoigatvuođaide

Vaikko doaibmaplána ii čoavdde buot hástalusaid, de das leat máŋga mávssolaš lávkki ovddasguvlui:

•  Pilohtaprošeakta LDO vuollásaš doaimma várás Davvi-Norggas: Dásseárvo- ja vealahusáittardeaddji (LDO) vuollásaš doaimma ásaheapmi mas lea sámi gelbbolašvuohta, lea deaŧalaš doaibmabidju. Dat maiddái lea Sámedikki iežas doaibmaplánas oassin.
• Ovttasbargoforum cielaheami ja vealaheami vuostá: Nationála forum galgá fállat aktevrraide oktasaš deaivvadansaji gos oktiiheivehit bargguid cielaheami ja vealaheami eastadeamis, ja dan seammás nannejuvvo suohkaniid gelbbolašvuohta.
• Buoret statistihkka vaššicealkámušaid ja vaššikriminalitehta birra: Buot politiijaguovllut galget dál jahkásaččat raporteret vaššikriminalitehta birra maid sápmelaččat vásihit nationála vaššikriminalitehta gelbbolašvuođaguovddážii, mii maiddái vuđolaččat analysere áššiid mat leat dieđihuvvon.

Sámediggeráđđi Runar Myrnes Balto lea hui giitevaš viiddis áŋgiruššama dihte plána hábmemis:

– Mii giitit Kultur- ja dásseárvodepartemeantta ja buot sámi ja eará aktevrraid geat leat ovddidan mávssolaš cealkámušaid. Dál álgá duohta bargu, ja mii illudit ovttasbargat plána čuovvoleami olis.

Dán siiddus sáhttá geahččat raportta almmustahttima