Sámediggi almmuhii čakčat fálaldatgilvvu sierra mátkeealáhusstrategiija ráhkadeami várás. Fálaldatgilvvu vuittii Kreativ Industri AS oktan vuollásaš lágideddjiiguin Mimir AS ja Orinor AS. Bargu bistá golbma jagi ja dan lea Nasjonal reiselivsstrategi 2030 ávžžuhan álggahit. 

– Sámi mátkeealáhusat ja sámi kultuvra buvttihit juo dál árvvuid ja dietnasa. Sámi mátkeealáhusfálaldagat leat čađačalmmagat. Mii illudit almmuhit ollislaš strategiija dan barggu vuođul mii dál dahkkojuvvo, dadjá politihkalaš ráđđeaddi Sandra Márjá West. Son jođiha strategiijabarggu stivrenjoavkku.  

Strategiija doaimmat

Strategiijas galget leat doaimmat ealáhusaide ja ovttas ealáhusaiguin Sámis – mat leat láidesteaddjin mátkeealáhusaid deaivvadeapmái sámi kultuvrrain, mearkagálvohuksemii ja historjjáid muitaleapmái, ja fierpmádagaid nanusmahttimii nu ahte dain lea nannosit čanastat sámi mátkeealáhusaid hutkás ealáhusaide ja borramušaide. 

Máŋggabealatvuohta ja synergiijaváikkuhusat 

Sámi mátkeealáhusat leat máŋggabealagat, dasa gullet buot boazodoalu ja guolásteami rájes hutkás ealáhusaide. Ollu fitnodagat leat smávvát ja rašit. Ulbmil lea lasihit iešguđet ealáhusaid dietnasa ja fállat mátkkošteddjiide eambbo fálaldagaid, dan seammás go nannet sámi giela, identitehta ja kultuvrra.  

Stivrenjoavku ja márkaniskkadeamit 

Prošeakta lea álgodásis. Dál leat ásaheame stivrenjoavkku mas leat mielde ealáhusdoaimmaid, Innovasjon Norge ja Sámedikki ovddasteaddjit. Kreativ Industri lea bargame márkaniskkademiiguin ja kártemiin.  

– Ulbmil lea ahte sámi rikkis historjá ja kultuvra gaskkustuvvo albma ja girjás vásáhusaiguin ja hutkás ealáhusaid fámuin. Strategiija galgá buvttihit erenoamáš vásáhusaid, main guossit leat sáhkkii, ja atnet árvvus ja váldet vuhtii sámi álbmoga ja kultuvrra. Mii sávvat ahte sámi mátkeealáhus šattašii máilmmiviidosaš ofelažžan álgoálbmogiid mátkeealáhusaide, dadjá West.  

Luonddu árvvus atnin lea sámi kultuvrra guovddáš árvu ja lea dehálaš mátkeealáhusstrategiijas.