– Dát lea gelddolaš vejolašvuohta sihke ásahuvvon ja ođđa aktevrraide sámi kultuvrra siskkobealde. Mii leat rámis go leat ođđasit juolludan ruđaid dáid ortnegiidda, go oaidnit stuorra beroštumi sámi kultuvra ja musihkkaprošeavttaide. Áŋgiruššan maid vásihat lea movttiidahtti! dadjá sámediggeráđđi Maja Kristine Jåma (NSR). 

2024:s lea Sámedikkis leamaš ollu eanet ohcamat, mii dagahii ahte dáid doarjjaortnegiid bušeahtta giddejuvvui juo borgemánus. Dál rahpá Sámediggi fas ohcanportála maŋŋel go leat ođđasisjuogadan bušeahta. 

2024 bušeahttajagis lea várrejuvvon olles 3,806 millijovnna kruvnno kulturdoaimmaide, ja 2,5 millijovnna kruvnno luohtái ja sámi musihkkii. 

– Mii ávžžuhit buohkaid geain leat hutkás prošeavttat mat ovddidit sámi kultuvrra, ohcat doarjaga, loahpaha sámediggeráđđi.