Sámediggeráđđi geas lea bušeahttaovddasvástádus Runar Myrnes Balto (NSR) oaivvilda buorren go Máhttodepartemeantta čuohppan dál lea muhtin muddui njulgejuvvon.

– Lea stuora dárbu sámi oahpponeavvuide, ja dárbu lea erenoamáš stuoris go guoská sámi digitála oahpponeavvuide. Sámediggi lea ožžon ohcamušaid 65,7 miljovnna ruvnno ovddas doarjjaortnegis masa lea biddjon 15,6 miljovdna ruvdno. Dát muitala ahte lágádusain lea kapasitehta ráhkadit oahpponeavvuid, muhto ahte juolludeapmi Ráđđehusas lea menddo uhcci, dadjá Myrnes Balto.

Ráđđehus lea 2023 reviderejuvvon nationálabušeahtas árvalan 12 miljovnna ruvdnosaš lassijuolludeami eahpedábálaš bálká- ja haddedárkilastima dihte.

– Sámediggi ii ožžon ollásit gokčojuvvot bálká- ja haddegoargŋuma 2023 stáhtabušeahtas, danne lean ilus dán lassejuolludeami dihte. Dat sihkkarastá ahte buohkat geat ožžot njuolggodoarjaga Sámedikki bušeahtas sáhttet bisuhit seamma doaibmadási go 2022:s, dadjá Myrnes Balto.

Sámediggeráđđi lei dasa lassin vuordán ruđa Duohtavuođa- ja soabahankommišuvnna raportta čuovvoleapmái.

– Sámediggi dárbbaša ruđa fátmmastit sámi álbmoga prosessii maŋŋel go duohtavuođa- ja soabahanraporta boahtá, ja lean beahtahallan go Ráđđehus ii leat váldán dan vuhtii, dadjá Myrnes Balto.

Sámediggeráđđi lea bures jođus Sámedikki 2024 bušeahtain, ja leat stuora vuordámušat 2024 stáhtabušehttii, mii boahtá čakčat. De leat vuordámušat ahte soabaheaddji doaimmat maŋŋel kommišuvdnaraportta ruhtaduvvojit. Dasa lassin lea ráđđehus dieđihan ahte áigu loktet sámi kultuvrra.

– Duohta sámi kulturlokten sáhttá dušše dáhpáhuvvat mearkkašahtti loktema bokte sámi servodahkii Sámedikki bokte. Mii leat gergosat vuoruhit go kulturlokten boahtá, dadjá sámediggeráđđi Runar Myrnes Balto (NSR).

Jearahallama addá ja gažaldagaid vástida sámediggeráđđi Runar Myrnes Balto (NSR), tel +47 977 73 778, runar.myrnes.balto@samediggi.no