Storebrandas lea Eolus Vind geahču vuolde dan sivas go ballet ahte Jillen-Njaarke boazosápmelaččaid olmmošvuoigatvuođaid rihkkot Øyfjellet bieggafápmohuksema geažil. Investorat buktet rávvagiid huksejeddjiide čalmmustan dihte vára ja evttohit doaimmaid movt  hehttet olmmošvuoigatvuođaid rihkkuma ja  rievtti doaimmahit kulturbarggu.

Maja Kristine Jåma– Sámediggeráđđi lea ovdal juo čujuhan dasa ahte boazodoalu beassan dálveorohahkii ferte sihkkarastojuvvot ja ahte álbmotrievttalaš geatnegasvuođat fertejit čuvvojuvvot. Go stáda ii oro oaidnime vára, dalle lea dehálaš ja riekta ealáhusain ja investoriin iskat áššiid lagabui, dadjá sámediggeráđđi Maja Kristine Jåma (NSR).

Doaimmat maid Storebrand evttoha lea ahte konsultašuvdnaproseassa ferte buoriduvvot ja das galgá mihttu olahit friddja ovdagihtii dieđihuvvon miehtan daidda geaidda ášši njuolga guoská.

– Investoriin lea maid ovddasvástádus ja sii berrejit diehtit mii sin ovddasvástádus lea go investerejit prošeavttaide sámi guovlluin. Buot fitnodagain berrejit njuolggadusat amas fuolahit ja gudnejahttet olmmošvuoigatvuođaid, lohká Jåma.

Sámediggeráđđi problematisere seammás ovdagihtii álgima dan oktavuođas go lea addon konsešuvdna bieggafápmodoaimmahahkii maid Oljo- ja energiijadepartemeantta addá.

– Dađi bahábut lea Øyfjellet huksen gárvvis ja dasto maid leat dehálaš boazoguohtonguovllut ja johtolagat billistuvvon. Ovdagihtii álginlohpi ii berreše addot sámi guovlluin ja miehtanprinsihppa berre nannejuvvot buot sisabahkkenáššiin. Vuorddan ahte ráđđehus čuovvula ášši, ja dan áiggun jearrat oljo- ja energiijaministaris go oainnán su moatti vahkku geahčen, loahpaha Jåma.

Loga raportta: Sustainable Investment Review - Q2 2022 

Gažaldagaid dahje jearahallama addá sámediggeráđđi Maja Kristine Jåma  , mobiila +47 472 42 366, maja.kristine.jama@samediggi.no