– Dat hirpmáhuhttá. NVE gávnnahii dárkilis guorahallamis ahte váikkuhusat sámi kultuvrii ja árbevirolaš geavahussii leat nu duođalaččat ahte ohcama berre biehttalit. Go Energiijadepartemeanta vállje ahte ii doahttal fágalaš árvvoštallamiid ja NVE mearrádusa, de čájeha ahte ii ollinge vuhtiiváldde ahte min vuoigatvuođat ja eatnamat leat juo stuorát deattu vuolde go maid girdet, dadjá sámediggepresideanta Silje Karine Muotka (NSR).
Departemeanta vuođušta mearrádusa dainna ahte ii leat doarvái vuođđu dadjat ahte ohcan livččii biehttaluvvon, ja ahte áššis eai leat doarvái dieđut vai sáhttá dohkálaš vuogi mielde árvvoštallat ovdamuniid ja heajos beliid. Sámedikki mielas dan lea váttis ipmirdit áššis man lagabui logi jagi leat dárkilit guorahallan, man váikkuhusaid leat árvvoštallan ja masa leat cealkámušat ovddiduvvon.
– Ráđđehus ferte ipmirdit ahte ii sáhte doaimmahit nu gohčoduvvon ruoná molsuma dainna lágiin ahte dan moatti guovllu gos eai leat sisabahkkemat, addá ránes industriijai. Eatnamiid jierpmálaš ja dohkálaš geavaheapmi sámi árvvuid vuođul lea buot buoremus vuohki suodjalit eatnamiid, áibbas nuppe láhkai go Davvi-prošeakta, dadjá sámediggepresideanta Silje Karine Muotka.
Sámediggepresideanta maiddái deattuha movt plánejuvvon ja čađahuvvon sisabahkkemat čuhcet sámi vuoigatvuođalaččaide.
Sámi vuoigatvuođaguoddit, sámi organisašuvnnat, kulturfágalaš birrasat ja báikkálaš vuostálastinjoavkkut leat olles áiggi váruhan Davvi bieggafápmorusttega váikkuhusaid vuostá. Sihke Sámediggi, Lágesduoddara orohat, Deatnogátte Sámiid Searvi ja álbmotakšuvdna Davvi bieggafápmorusttega vuostá dorjo NVE biehttaleami. Dat dahká departemeantta vuođuštusa vel eanet čalbmáičuohccin.
– Dat lea hirbmat váivi daidda sámi vuoigatvuođalaččaide geat máŋggaid jagiid leat geavahan ollu resurssaid duođaštit prošeavtta váikkuhusaid. Dát diehtu boahtá vel juste go boazodoallu lea losimus bargguid siste njuovvamiid, rátkkašemiid ja johtimiid dáfus. Departemeanta galggašii áddet movt dakkár riidodilit mat bistet jahkeviissaid čuhcet olbmuide geat juo leat garra barggus, dadjá Muotka.
Sámediggi deattuha ahte dát ii mearkkaš ahte Davvi bieggafápmodoaimmahat lea dohkkehuvvon.
– Mii leat guhká bargan bieggafápmorusttega vuostá ja mii áigut ain bargat sámi vuoigatvuođalaččaid ja eatnamiid ovddas, dadjá presideanta.
Sámediggi bivddii reivves geassemánu 5. beaivvi 2026 doallat konsultašuvnnaid jus árvvoštalle rievdadit NVE mearrádusa. Dattetge dahkkui mearrádus konsultašuvnnaid haga, iige Sámediggi leat ožžon čálalaš čilgehusa manne sin ávžžuhus ii čuovvoluvvon.
Presideanta Silje Karine Muotka lea kritihkalaš dasa movt departemeanta lea gieđahallan ášši.
– Go departemeanta vállje hilgut biehttaleami áššis mii váikkuha sámi vuođđoberoštumiide, de vuordit mii konsulterejuvvot dan birra. Dan leat mii gáibidan. Dattetge dahkkui mearrádus albma konsultašuvnnaid haga Sámedikkiin. Mii leat sakka behtton, dadjá presideanta.
Jearahallama šiehtat sámediggeráđi politihkalaš ráđđeaddiin Håkon Mudenia (NSR) + 47 979 50 115, hakon.mudenia@samediggi.no.