– Sámediggeráđđi lea bušeahttaevttohusas vuoruhan čuovvulit eanaš lasáhusaid reviderejuvvon bušeahtas 2025, dan liige 50 miljovnna ruvnno oktavuođas mii bođii Stuoradikkis. Mii leat lasihan juolludemiid sámi giellaguovddážiidda, kulturásahusaide ja leat lasihan eanaš ohcanvuđot doarjjaortnegiid, dadjá sámediggeráđđi Maren Benedicte Nystad Storslett (NSR).

Maren Benedicte Nystad Storslett Ørjan Marakatt Bertelsen

Sámedikki bušeahttarámma lea lassánan oktiibuot 32 367 000 ruvnnuin salderejuvvon bušeahtas, mii mielddisbuktá ahte rámma lassána 3,5 proseanttain. Haddegoargŋun stáhtabušeahtas lea meroštallojuvvon leat 3,1 proseantta, juoga mii mearkkaša ahte Sámediggi lea ožžon buhtaduvvot haddegoargŋuma ja veahá friddja ruđa. Juolludeamis lea ráđđehus várren 2,6 miljovnna ruvnno dasa go Sálat suohkana lea searvame sámegielaid hálddašanguvlui, ja 7 miljovnna ruvnno sámi ealáhusfondii.

– Mii leat hui ilus go Sálat suohkan searvá sámegielaid hálddašanguvlui. Mii leat maid ožžon ođđa giellaguovddáža Málatvuomis bušehttii, mii ovdal lea ožžon doarjaga giellaguovddáža ásaheapmái. Dát boahtá nannet sámegielaid, lohká Nystad Storslett.

Ođđa doarjjamodealla guovttegielatdoarjagiidda suohkaniidda ja fylkkasuohkaniidda álggahuvvo 2026:s. Sámediggeráđđi lea nannen ortnega 8,4 miljovnna ruvnnuin. 

Bušeahtas lea maid várrejuvvon ruhta bargojovkui mii galgá evttohit ođđa boraspirepolitihka guohtunealáhusaide mas sámi álgoálbmotmáhttu lea vuođđun, ja ruhta sámi goanstajierbmestrategiija bargui. 

Sámediggi meannuda bušeahta lávdegoddečoahkkimis skábmamánu 17.-21. beivviid ja dievasčoahkkimis juovlamánu 1.-5. beivviid.

Loga: Sametingsrådets forslag til budsjett for 2026