- Ráđđehus lea bággen Fovse-sámiid dakkár soabadadillái go eai dáhto vuhtiiváldit Alimusrievtti duomu, lohká sámediggepresideanta Silje Karine Muotka (NSR).
Boazodollui lea molssaeaktu soabaheapmái ođđa guhkes riekteproseassa, ja dat čájeha ahte soabaheapmi ii leat proseassa mas vuhtiiváldet boazodoalu dili Fovsenis. Ráđđehus ii leat fuolahan ahte olmmošvuoigatvuođarihkkun loahpahuvvo dahje buoriduvvo. Soabaheapmi lea bisttánvihtta mánu almmá stuora rievdadusaid haga.
- Stáhtas lea divodan-geatnegasvuohta ja dat mielddisbuktá ahte boazodollui Fovsenis sihkkarastojuvvojit dálveorohagat mat leat vuođđun doibmii. Ii oro leamen nu ahte ráđđehus áigu čuovvolit dán, ja danne ipmirdan bures ahte davvijoavku árvvoštallá botket soabadeami. Ii leat sin ovddasvástádus loahpahit olmmošvuoigatvuođarihkkumiid, dadjá sámediggepresideanta.
Ráđđehus plána haga
Dál go soabahangeahččaleapmi gahččá čoahkkái, de oaivvilda Sámediggepresideanta ahte ráđđehusa váilevaš dáhttu čuovvoleapmái oainnusindahkko. Odne lea 2 jagi áigi go Alimusriekteduopmu bođii. Ráđđehus geavahii 500 beaivvi dovddastit olmmošvuoigatvuođa rihkkuma, ja dat dáhpáhuvai easkka maŋŋá go nuorra olmmošvuoigatvuođaáittardeaddjit ledje demonstreren ja akšuneren vahkku. Dál leat nuorat ferten bissehit eallimiiddiset ja álggahit ođđa miellačájehemiid Ráđđehusa sealggahisvuođa geažil.
- Ráđđehus lea bidjan boazodolliide ovddasvástádusa fuolahit olmmošvuoigatvuođaid. Dat lea duođalaš ovddasvástádushilgun ja dagaha ahte luohttámuš olmmošvuoigatvuođarihkkumiid loahpaheapmái ja divvumii gáikkoduvvo duhát bihttán. Dál čájehuvvo ahte soabaheamis maiddái ii leat dáhttu čuovvulit duomu. Ráđđehus almmustahttojuvvo go buot sin geahččaleamit gahččet čoahkkái ja báhcet dasa guoros gieđiguin, dadjá sámediggepresideanta Muotka.
Aaslanda čielggadaprográmma maid gahččá čoahkkái
Ráđđehus ja Aasland leaba guokte jagi čuoččuhan ahte dárbbašuvvo viiddis čielggadanproseassa ja ođđa máhttovuođđu ovdalgo sáhttá dahkat ođđa mearrádusa. Dál lea Aasland dadjan vástádussan Stuorradiggái ahte sii leat gaskkalduhtten čielggadanprográmma.
- Sámediggi ja orohat leat moaitán čielggadanprográmma. Dál lea Oljo- ja energiijaministtar fuobmán ahte ii leat vejolaš joatkit čielggadanprográmmain almmá min soahpama haga. Lea gollan guokte jagi ovdalgo ráđđehus ipmirdii ahte dákkár vuohki ii leat vejolaš, dadjá sámediggepresideanta.
Sierraoaivilšvuohta máhttovuođu hárrái lea ahte Sámediggi ja orohat oidnet ahte OED áigu čielggadit dainna ulbmiliin ahte joatkit bieggafápmorusttegiid doaimmaheami, ja ahte departemeanta áigu čielggadit doaibmabijuid maid Alimusriekti juo lea vuđolaččat čielggadan. Alimusrievtti gieđahallamis ovddiduvvojedje badjel 2700 siiddu boazodoallofágalaš materiála.
Sámediggi ja orohat leat čujuhan ahte čielggadusa mihttomearrin ferte leat loahpahit olmmošvuoigatvuođarihkkuma ja ahte čoavddus ferte čuovvut divvungáibádusa.
- Vaikko Fosen-ášši lea okta dain áššiin mii eanemusat leat čielggaduvvonn, ja lea mannan čađa olles riektevuogádaga, de lea ráđđehus háliidan ođđasis geahččalit Alimusrievtti duomu. Dan eat leat dieđusge dohkkehan. Dál go leat gaskkalduhtten čielggadanprográmma ja Fovse davvijoavku áitá guođđit soabaheami, de lea dušše okta čoavddus báhcán. Ráđđehus ferte dalán heaittihit doaimma ja njulget olmmošvuoigatvuođarihkkuma, loahpaha sámediggepresideanta Silje Karine Muotka (NSR).