– Áššehuhttin lea nana signálan ráđđehussii dan birra ahte miellačájeheamit mat konkrehta bealuštit demokratiija ja riektestáhta lea nannosit suodjaluvvon rievttálaččat. Go ráđđehus 500 beaivvis ii leat doahttalan Alimusrievtti duomu, de ferte vuordit ahte šaddet miellačájeheamit ja ráfehuhttimat iežas vuostá.

Miellačájehus lei njuolga ráđđehusa vuostá, ja boađusin lei ahte ráđđehus vuosttaš geardde badjel 500 beaivvi maŋŋá dovddastii ja šállošii olmmošvuoigatvuođaid rihkkuma mii lea jođus.

– Mun giittán miellačájeheddjiid duostilvuođa ovddas ja persovnnalaš goluid ovddas maid sii leat váldán olmmošvuoigatvuođaid, riektestáhta ja sámi kultuvrra vuođu suodjaleami oktavuođas, dadjá sámediggepresideanta Silje Karine Muotka.