– Mun oainnán ahte ministtar bealušta ráđđehusa ja stáhta meannudeami Fovsen Njaarke -áššis. Seammás lea čielggas ahte čuovvoleapmi ii leat leamas doarvái buorre, juoga maid ministara šállošeapmi boazodollui čájeha. Ovttajienalaš Sámediggi bivdá bealátkeahtes guorahallama stáhta áššemeannudeamis. Mun oaivvildan ahte dan ferte gáibidit, erenoamážit go ministtar iežas árvvoštallamiid vuođul áššehuhttá stáhta áššemeannudeami, dadjá sámediggepresideanta Silje Karine Muotka (NSR).

– Čielggadeami dáfus man birra ministtar hupmá, lea Alimusriekti gávnnahan ahte konsešuvdnamearrádus ii leat gustovaš. Danne berre OED fámohuhttit konsešuvdnamearrádusa. Ii leat dárbu čielggadit dan gažaldaga, danne go Alimusriekti lea mearridan ahte mearrádus ii gusto. Jus galgá dahkkot ođđa konsešuvdnamearrádus, mas gaikun ferte leat molssaeaktu, de sáhttá dan čielggadit maŋŋel. Mii leat maid dan oaivilis ahte ferte ovddemusat čielggadit movt sámiid olmmošvuoigatvuođaid galgá vuhtiiváldit, ii ge movt bieggafámuid galgá doalahit, dadjá sámediggepresideanta Muotka.

 – Olmmošvuoigatvuođalaš geahččanguovllus ii leat mihkke dadjamušaid das makkár elfápmodárbu dihto guovllus lea, ja dan vuođusta maid Alimusriekti. Oainnán ahte sihke ministtar ja stáhtaministtar juohke háve go lea vejolašvuohta, dadjaba ahte ferteba dássádallat dehálaš beroštumiid. Olmmošvuoigatvuođarihkkun lea dattetge olmmošvuoigatvuođarihkkun, ja dan ferte bissehit. Dat lea áidna mii lea relevánta Fovsen Njaarke -áššis, loahpaha Muotka.