Mii leat vuostáiváldán morašdieđu, ahte Gonagas Harald V lea vádjolan. Sámi álbmot lea morrašis.
Norgga Gonagasviessu lea áiggiid čađa čielgasit dorjon sámi álbmoga, sámi kultuvrra ja min gielaid. Gonagas Haraldis lea leamaš čohkkejeaddji fápmun, ja lea doalahan Gonagasviesu nanu sajádaga sámiid gaskka.
Mii leat buorit Gonagasvissui ja mii leat álohii leamaš buorit Gonagas Haraldii. Mii vásiheimmet ahte dat illu lei goabbatbeallásaš.
Gonagas lea jámma galledan Sámi, earret eará searvan árbevirolaš ja allaárvosaš Sámedikki rahpandoaluide, juohke njealját jagi. Su sániin das, ahte Norga lea vuođđuduvvon guovtti álbmoga eatnamiid ala, lea leamaš vearditmeahttun mearkkašupmi sámiide ja sámi politihka ovdánahttimii.
Gonagas lea maiddái oassálastán dehálaš lágidemiide. Sámiide lei stuorra ja dehálaš dáhpáhus go sihke Gonagas ja Ruvdnaprinsa oassálasttiiga logat Sámedikki rahpamis Kárášjogas golggotmánus 2025.
Lei maid illun Oslo sámiide, go Gonagas ávvudii Sámi álbmotbeaivvi ovttas 500 bovdejuvvon gussiiguin Oslo ráđđeviesus 2023:s. Golggotmánus 2022 galledii Gonagas lullisámiid Gïelevåhkoe oktavuođas Snåases.
Lullisámit atne hui árvvus go Gonagaspárra galledeigga lullisámi guovlluid, lulimus Nordlánddas geassit 2023:s. Dán mátkkis guoskkaheigga Duohtavuođa- ja soabahankommišuvnna guorahallanraportta mearkkašumi.
Gonagas lea maiddái Šloahta almmolaš dilálašvuođaide fátmmastan sámi ovddasteddjiid iežas doaibmaáigodagas. Mis, geain lea leamaš dat gudni ahte leat beassan oassálastit su doaluin, leat álo vuostáiváldon liekkusvuođain, duohta beroštumiin ja sáhkkiivuođain. Juohke gávnnadeamis lei dego deaivvadit boares skihpáriin.
Midjiide mearkkašii hui olu ahte Gonagas Harald áŋgirušai min bargui čalmmustahttit sámegielaid. Gonagas lea maid máŋgii fitnan Sámis, sihke priváhta ja almmolaš oktavuođain, ja sus ledje liekkus sánit iežas vásáhusain ja deaivvademiin olbmuiguin dáppe Sámis.
Gonagas lea buot dáid jagiid, earenoamážit almmolaš ja bearašlaš dáhpáhusain, čájehan iežas olmmošlaš, liekkus ja leaikás luonddu. Mis lei nu fiinna guoibmás gonagas, ja sus lei erenoamáš dáidu čájehit ovddasmorraša olbmuide geaid deaivvai iešguđetge sajis riikkas.
Gonagas Harald lei fátmmasteaddji olmmoš ja son áddii sámiid dili. Sus lea leamaš erenoamáš stuorra ja dehálaš eallinbargu.
Iežas moanat sártniin našuvdnii čájehii son nana návccaid fátmmastit ja čatnat oktii iešguđegelágán joavkkuid servodagas. Gonagas Harald lei mávssolaš olmmoš, geas báhcet čiekŋalis luottat.
Gonagasbearrašis gártet dál oahppat eallit viidásit iežaset isida, áhči, vuohpa ja ádjá haga.
Sámi álbmoga bealis háliidan cealkit čiekŋalis oassádallandearvvuođaid gonagasbearrašii. Mii váldit oasi sin morrašis.
Diktačálli Áillohaš lei okta min mávssolaš dáiddáriin. Son čálii:
ja go visot lea meaddel
ii gullo šat mihkkege
ii mihkkege
ja dat gullo
***
og når alt er forbi
høres ingenting lenger
ingenting
og det høres
Gonagas lea vádjolan – Ellos Gonagas
Kongen er død – Leve Kongen