Sara Duodji lea sámi bearašfitnodat Kárášjogas mii ásahuvvui jagis 1991. Fitnodaga ulbmil lea buvttadit sámi ulloduoji, namalassii ullocokkaldagaid ja kartáŋkkaid. Fitnodat buvttadii beassecokkaldagaid ja ullokartáŋkkaid Suodjalussii badjel 20 jagi.

Sara Duodji AS rievdadii doaimmas ovttaolbmofitnodagas oasussearvin jagis 2021, ja lea dál stuora nuppástuhttin- ja ovddidanmuttus ja dárbbaša beavttálmahttit doaimma. Fitnodat lea dál ovddideame teknihkalaš tevnnegiid ja hukseheame ođđa duhppenmašiinnaid.

– Sara Duodji AS lea hui dovddus min guovlluin, ja lea illudahtti oaidnit ahte fitnodat áŋgiruššá buvttadit báikkálaččat ja ovddidit fitnodaga, dadjá sámediggeráđđi Berit Marie Eira (JSL).

380 000 ruvdnosaš doarjja juolluduvvo duoji doarjjaortnega bokte: Investeremat, ovddidandoaimmat, konsuleantaveahkki ja álggahandoarjja.