Norga raportere juohke viđat jagi ILO áššedovdilávdegoddái. Sámediggi raportere njuolga ILO:i seamma áigodagas go Norga, oainnusmahttin dihtii movt Sámediggi dulko ja čuovvu konvenšuvnna.
International Labour Organization (ILO) lea ON riikkaidgaskasaš sierraorganisašuvdna bargoeallima várás. ILO:s leat 187 miellahttoriikka. Norga lei vuosttaš riika mii dohkkehii ILO-konvenšuvnna nr. 169 (ILO-169) Stuoradikki mearrádusas geassemánu 20. beaivvi 1990, ja konvenšuvdna bođii fápmui čakčamánu 5. beaivvi 1991. Ovdal jagi 2023 ledje 24 miellahttoriikka ratifiseren ILO-169.
ILO-169:s leat mearrádusat eamiálbmogiid vuoigatvuođa birra ieža mearridit iežaset kultuvrralaš ovdáneami, oahppat geavahit iežaset giela ja ásahit iežaset ásahusaid maid bokte ovddastit iežaset eiseválddiid ektui. Konvenšuvdna dohkkeha álgoálbmogiid dárbbu hálddašit iežaset eallinvuogi ja ekonomalaš ovdáneami. Dát mearkkaša ahte stáhta galgá láhčit dilálašvuođaid sámi identitehta, giela ja oskku bisuheapmái ja viidáset ovddideapmái daid stáhtaid rámmaid siskkobealde gos sámit ellet. Konvenšuvnnas leat mearrádusat earret eará barggolašvuođa ja bargoeallima, oahpahusa, oaju ja dearvvašvuođa birra. Dasto addá konvenšuvdna dárkilis njuolggadusaid dasa mo stáhta galgá dohkkehit eamiálbmogiid eanavuoigatvuođaid.