– ILO-konvenšuvdna lea deaŧalaš olahus álgoálbmogiid vuoigatvuođaid dohkkeheamis, muhto vaikko vel 32 jagi leat gollan dan rájes go Norga dohkkehii konvenšuvnna, de leat mis hástalusat mat áitet min kultuvrra, giela ja ealáhusaid ceavzima, dadjá sámediggepresideanta Silje Karine Muotka duođas.

Raportere Fovse-ášši ja Muolkkuid

Guokte dain eanemus válddahallojuvvon sisabahkkenáššiin maŋemus jagis - Fovse-ášši ja Muolkkuid elektrifiseren oaivvilda sámediggeráđđi ferte dieđihuvvot ILO:i. Norgga Alimusriekti lea nannen ahte bieggamillohuksenmearrádus Fovses lea eahpegustojeaddji.

– Ráđđehus ii leat soahpan ii Sámedikkiin iige guoskevaš boazosápmelaččaiguin, ja dat olmmošvuoigatvuođarihkkun mii dál dáhpáhuvvá joatká. Dat lea dohkkemeahttun, deattuha sámediggepresideanta Muotka.

Sámediggeráđđi áigu maiddái raporteret mearrádusa Muolkkuid elektrifiseremis konsultašuvdnageatnegasvuođa rihkkuma oktavuođas. 

– Lea hui kritihkalaš ahte min jienat guldaluvvojit ja váldojuvvojit vuhtii, erenoamážit áššiin mat njuolga váikkuhit min eallimii ja min boahtteáigái. Oljo- ja energiijadepartemeanta ii leat ádden iežas konsulterengeatnegasvuođa, ja mearrádus ii leat dan geažil gustovaš, dadjá sámediggepresideanta

Deaddu sámi kultuvrii ja árbevirolaš ealáhusaide

Sámedikki raporta čilge maiddái negatiiva servodatovdáneami sámi servodagas. Erenoamážit lea dat fuolastuhtti dan deattu geažil maid sámi kultuvra ja giella vásihit. Sámegielat, mat garrasit hedjonedje Norgga dáruiduhttinpolitihka geažil, leat ain áitojuvvon gielat. Dasa lassin vásihit sápmelaččat garra deattu sámi árbevirolaš ealáhusaide gáržžes eavttuiguin ealáhusaid bisuheapmái ja viidáset ovddideapmái.

– Sámi gielat, kultuvra ja ealáhusat leat ain hirbmat garra deattu vuolde. Mii dárbbašit eanet návccaid jorgalahttit dán treandda, ja duohtavuođa- ja soabahankommišuvnna raportta vuođul lea dál áigi ahte eiseválddit ollašuhttet geatnegasvuođaideaset, dadjá sámediggepresideanta Silje Karine Muotka loahpas.