Maja Kristine Jåma
Åse M. P. Pulk / Sámediggi
Dáiddadállu Guovdageainnus ja SALT art & music Oslos háliidit lagat ovttasbarggu ja meinejit doallat čájáhusa SALT olggobealde, mii lea Langkaias Oslo guovddážis. Čájáhus addá gehččiide vejolašvuođa vásihit sámi dáidaga ja oahpásnuvvat sámi dáiddagaskkusteapmái. Čájáhus lea rabas miessemánu 31. beaivvi rájes gitta geassemánu 21. beaivái.
– Sámi dáiddárat ja dáidda leat váldán saji riikkaidgaskasaš dáiddalávddis, muhto ain váilot struktuvrrat dasa mot Sápmi, davvin, duođas gulahalašii gehččiiguin lulde. Danne galgá nannet friddja dáiddafágasuorggi ovttasbarggu, dadjá sámediggeráđđi Maja Kristine Jåma (NSR).
Johttičájáhus mii lea oidnosis daidda geat olgun vánddardit
Dáiddadálu dáiddárat, Ann-Sofie Kallok ja Susanne Hætta, leaba ovttas dáiddafágalaš jođiheddjiin, Máret Ánne Sarain, ceggen johttičájáhusa. Čájáhus lea hui áigeguovdil miellačájehemiid maŋŋel Oslos, man birra lea leamaš ollu sáhka ođđasiin maŋemus mánuid. Čájáhus lea maiddái seamma áiggi go Duohtavuođa- ja soabadankommišuvdna geige guorahallanraporttas Stuoradiggái geassemánu 1. beaivvi. Dáiddárat plánejit maiddái lágidit soabadankonseartta SALTas.
– Dáidagat loktejit ovdan áigeguovdilis fáttáid ja hástalusaid mat sámi servodagas leat. Dát čieža dáiddára beroštit luonddus ja dálkkádagas, sámi areálarahčamis, boazodoallopolitihkas ja olbmuid, elliid ja luonddu oktavuođas, dadjá Jåma.
Erenoamáš geahčastat sámi dálááiggedáidagii
Čájáhusas leat 12 dáidaga maid 7 dáiddára leat hábmen, ja sii leat Máret Ánne Sara, Anja Saiva Bongo Bjørnstad, Anitta Suikkari, Hilde Skancke Pedersen, Susanne Hætta, Ann-Sofie Kallok ja Elle Sofe Sara.
– Čájáhusa viidodat, máŋgga dáiddára fágaidrasttideaddji aspeakta, addá erenoamáš geahčastaga sámi dálááiggedáidagii, ja Oslos, mii lea oaivegávpot ja gos ásset eanemus sápmelaččat Norggas, lea stuora vejolašvuohta oainnusmahttit čájáhusa olu eanet gehččiide, dadjá Jåma.
Gažaldagaid ja jearahallamiid oktavuođas bivdit váldit oktavuođa sámediggeráđiin Maja Kristine Jåmain (NSR), tlf. +47 472 42 366, maja.kristine.jama@samediggi.no