Runar Myrnes Balto
Kenneth Hætta
Finnmárkku politiijaguovlu oaččui 2022:s barggu Politiijadirektoráhtas ásahit Stáda mánáidviesu sámi guovddášguvlui Finnmárkkus. Barggus lea dárkilit čilgejuvvon ahte mánáidviessofálaldaga sámi guovddášguovllus galgá fátmmastit buot mánáid ja erenoamážit hearkkes rávisolbmuid geat orrot Finnmárkkus.
Sámediggeráđi mielas leat áibbas čielggas ahte barggahanreive ráđđehusas Politiijadirektoráhttii ahte áigumuš mánáidviesu ásahemiin Finnmárkui lea sihkkarastit fálaldaga sámi mánáide main sámi giella ja kulturgelbbolašvuohta lassin fágalaš mánáidgelbbolašvuhtii veagalváldima ja illasteami birra: Ásaheami duogáš lea sihkkarastit ahte sámi mánát geat leat vásihan veagalváldima ja illasteami ožžot fálaldaga mii lea heivehuvvon iežaset gillii ja kultuvrii.
Sámediggeráđđi lea árvvoštallan ahte jus ásahit Stáda mánáidviesu Kárášjohkii, de deavdá dat sihke mánáidfágalaš gelbbolašvuođa, ja maiddái sámi giela ja kulturgelbbolašvuođa gáibádusaid. Kárášjogas lea juo nanu sámi fágabiras dearvvašvuođas, earret eará lea doppe Sámi našuvnnalaš gealboguovddáš - psyhkalaš dearvvasvuođasuddjen ja gárrendilli (SÁNAG) ja spesialistadoavtterguovddáš.
– Ágga ahte leat unnit gažadeamit Sis-Finnmárkkus ii sáhte leat mearrideaddjin dás, go Stuorradiggi lea diŋgon mánáidviesu mii fuolaha sámi mánáid fálaldaga sámi guovddášguovlluin, dadjá Myrnes Balto.
Sámediggeráđđi deattuha ahte sámi álbmot lea unnitlogus eanetlohkoálbmoga ektui ja dasto leat dieđusge unnit gažadeamit doppe. Mearkkašahtti fuomášupmi lea ahte logistihkka ii leat ovdal hehtten eará institušuvnnaid mat meannudit mánáid ásaiduvvat Kárášjohkii.
– Stádas lea olmmošvuoigatvuođalaš geatnegasvuohta sihkkarastit mánáid veagalváldima ja illasteami vuostá. Buoremus čoavddus dasa lea ásaheapmi Kárášjohkii, dadjá Myrnes Balto.
Sámediggeráđđi lea buktán gulaskuddancealkámuša Finnmárkku politiijaguvlui dán áššis, ja lokte maid dán ášši dievasčoahkkimii njukčamánus. Sámediggi lea erenoamážit namuhuvvon bargogohččumis institušuvdnan mii galgá váldot mielde Mánáidviesu ásaheami prosessii ja sámediggeráđđi áigu dan oktavuođas bivdit konsultašuvnnaid ráđđehusain dán áššis.
Loga dievasčoahkkima áššebáhpiriid: Sak 9/23 - Etablering av Statens Barnehus i Finnmark
Jearahallama addá ja gažaldagaid vástida sámediggeráđđi Runar Myrnes Balto (NSR), +47 977 73 778, e-poasta runar.myrnes.balto@samediggi.no