Sámediggeráđđi Maja Kristine Jåma ja sámediggepresideanta Silje Karine Muotka
Ørjan Marakatt Bertelsen
– Ráđđehusa mearrádus váldá stuorra areálaid Romssas ja Finnmárkkus dakkár leavttuin maid mii eat leat ovdal oaidnán, ja danne mii háliidit vejolašvuođa árvvoštallat ášši čuoččaldahttit. Mii šaddat geahččalit eará vejolašvuođaid go vásihit ahte mii eat oaččo albma gulahallama dahje proseassaid dán birra ráđđehusain, dadjá sámediggepresideanta Silje Karine Muotka (NSR).
Sámedikki dievasčoahkkin meannudii 2023 čakčamánus ráđđehusa Muolkkuid-mearrádusa mas buot bellodagat oaivvildedje ahte ráđđehusa Muolkkuid elektrifiserenmearrádus galgá gessojuvvot ruovttoluotta. Danne lea dát ášši geahčadeapmi das makkár vejolašvuođat leat viidáset čuovvoleamis.
– Muolkkuid-mearrádus lea earenoamáš váttisvuohtan danne go lea nu viiddis bieggafápmohuksen maid dat mielddisbuktá. Dainna áigumušain mii lea biddjojuvvon, gieđahallojuvvo juohke bieggafápmorusttet sierra, muhto ii oktage váldde ovddasvástádusa sisabahkkemiin go geahččá daid ollislaččat ja dain duođalaš váikkuhusain maid ráđđehusa mearrádus mielddisbuktá, dadjá ráđđelahttu Maja Kristine Jåma.
– Nu go dilli lea dál, de ii leat sámiid kulturdoaimmaheapmi, ealáhusdoaimmat iige luonddugeavaheapmi vuhtiiváldojuvvon. Danne lean bivdán fápmudusa dievasčoahkkimis vai lea doaibmanvejolašvuohta vejolaččat váldit rievttálaš lávkkiid áššis, dadjá sámediggepresideanta.
– Mun oaivvildan ahte lea menddo guhkes áigi vuordit čakčii, ja oainnán ahte lea dárbu čađahit árvvoštallamiid ja vihkkedallamiid govttolaš áiggis. Danne dát dievasčoahkkinášši boahtá dál, loahpaha sámediggepresideanta Silje Karine Muotka.
Sámedikki presideanta lea bovden Sámedikki joavkojođiheddjiid čoahkkimii disdaga boahtte vahkus addin dihte eanet dieđuid áššis.
Ášši galgá vuos meannuduvvot Sámedikki ealáhus- ja kulturlávdegottis miessemánu 27.-31. beivviid. Dasto galgá ášši meannuduvvot Sámedikki dievasčoahkkimis geassemánu 13. beaivvi.
Loga áššebáhpiriid áššis 026/24 Čuovvoleapmi Sámedikki mearrádusas Muolkkuid elektrifiserema oainnu birra