Maren Benedicte Nystad Storslett

– Jus studeret sámegielat mánáidgárdde- dahje oahpaheaddjeoahpu, de oaččut dál 90 000 ruvnno jahkásaččat. Stipeandalasáhus galgá leat motivašuvdnan eambbosiid oažžut gazzat ja gárvet sámegielat pedagogalaš oahpu. Mis lea stuora dárbu sámegielat fágaolbmuide skuvllain ja mánáidgárddiin, dadjá sámediggeráđđi Maren Benedicte Nystad Storslett (NSR).

Juohke lohkanbaji oažžu 45 000 ruvnno jus studere ollesáiggis sámi mánáidgárdeoahpaheaddje- dahje vuođđoskuvlaoahpaheaddjeoahpu, dahje vuođđoskuvlaoahpaheaddje- dahje lektoroahpu mas sámegiella lea fágasuorggis. Ovdal lei supmi 25 000 ruvnno juohke lohkanbaji.

Oasseáiggeoahppit geat váldet gaskal 15 ja 29 oahppočuoggá ožžot 18 000 ruvnno juohke lohkanbaji, ja sii geat váldet gaskal 10 ja 14 oahppočuoggá ožžot 9 000 ruvnno juohke lohkanbaji.

– Sámedikki stipeanddat leat oassin min rekrutterenáŋgiruššamis. Mii leat vuoruhan lasáhusa oahpuide mat addet sámegielat gelbbolašvuođa alit oahppodásis, dadjá Nystad Storslett.

Lasáhus maid ohppiide geain lea sámegiella joatkkaoahpahusas

Sámediggeráđđi lea maid lasihan stipeanddaid ohppiide geat lohket sámegiela joatkkaskuvllas. Dál ožžot sis geain lea vuosttašgielatoahpahus 15 000 ruvnno, sámegiella 2 oahppit ožžot 7 000 ruvnno ja oahppin geain lea sámegiella 3 ja sámegiella vierisgiellan ožžot 4 000 ruvnno.

Sámediggi lea njukčamánus juolludan stipeanddaid 570 oahppái joatkkaskuvlla dásis.

– Giellastipeanddat joatkkaskuvlla ohppiide lea dehálaš oassin movttidahttit ohppiid lohkat sámegiela. Dat lea maid dehálaš vuođđun jus áiggut sámegielat gelbbolašvuođa alit oahppodásis, dadjá Nystad Storslett.