– Dađi bahábut diehtit mii ahte ollu álgoálbmotnissonat dávjá eai beasa searvat mearridanproseassaide mat sidjiide gusket. Dat lea váttisvuohtan dan dihte go álgoálbmotnissonat ja nieiddat dávjá leat hearkkibut, ja vealahuvvojit máŋgga ášši geažil. Mii háliidit čoahkkimis loktet sámi perspektiivvaid, ja čájehit solidaritehta eará álgoálbmogiidda, dadjá sámediggeráđđi Maja Kristine Jåma.

Dán jagáš ON-čoahkkima fáddá lea geafivuođa jávkadeapmi ja ásahusaid ja ruhtadeami nannen sohkabealperspektiivvas. Kultur- ja dásseárvoministtar Lubna Jaffery jođiha Norgga delegašuvnna Nissonkommišuvnnas, molssaevttolaččat jođiheaba Kultur- ja dásseárvodepartemeantta stáhtačálli Erlend Kaldestad Hanstveit ja Olgoriikkadepartemeantta stáhtačálli Bjørg Sandkjær. Čoahkkimis galgá sohppojuvvot loahppadokumeanta masa Sámediggi buktá cealkámušaid.

Sámediggeráđđi searvá Nissonkommišuvnna almmolaš rahpamii, paneladigaštallamii davviriikkalaš dásseárvomodeallaid birra ja pláne searvat máŋgga čoahkkimii, sihke bilaterála čoahkkimiidda ja siviilaservodagain. 

– ON álgoálbmogiid bistevaš forum 2023 konkrehtalaččat ávžžuhii Nissonkommišuvnna čuovvulit ON nissonlávdegotti ávžžuhusa álgoálbmotnissoniid ja nieiddaid vuoigatvuođaid hárrái. Mun háliidan maiddái váldit ovdan dan, ahte dálkkádatrievdamiin, luonddu massimis ja álgoálbmotnissoniid geafivuođas lea oktavuohta. Go min birgenvuođđu jávká, de dat dagaha geafivuođa mii čuohcá erenoamážit nissonolbmuide, dadjá sámediggeráđđi. 

Sámedikki searvama vuođđun ON nissonkommišuvnna 68. čoahkkimii lea Beaiveálgu-julggaštus, Sábme-jállu – Sámedikki dieđáhus dásseárvvu birra (2020) ja Sámediggeráđi čilgehus álgoálbmotvuoigatvuođaid, solidaritehta ja riikkaidgaskasaš barggu birra (2023)