Runar Myrnes Balto Åse M. P. Pulk/Sámediggi

– Lea dehálaš áimmahuššat bihtánsámi kulturárbbi. Visttit leat duođaštussan dasa movt bihtánsámit leat eallán, orron ja ásaiduvvan. Vaikko muhtun visttit eai leat šat anus, de lea dehálaš fuolahit daid ja dokumenteret huksenvieruid ja árbedieđuid, dadjá sámediggeráđđi Runas Myrnes Balto (NSR).

Sámediggi lea rahpan sierra ohcanvuoru bihtánsámi vistegáhttema várás sámi kulturmuitosuodjalusa doarjjaortnega bokte.

500 000 ruvdno lea várrejuvvon dása:

• Registreret ja duođaštit visttiid ja kulturbirrasiid gos leat visttit, mat gullet bihtánsámi kultuvrii.
• Čohkket ja duođaštit árbedieđuid ja máhttofievrrideami mat leat čadnon bihtánsámi visttiide ja huksenárbevirrui.
• Ráhkadit dilleárvvoštallamiid ja divodanplánaid bihtánsámi guovllu ráfáidahttojuvvon ja gáhttenárvosaš visttiide.
• Hoahppodoaimmaide mat sihkkarastet ráfáidahttojuvvon ja gáhttenárvosaš visttiid, ja álggahit dahje joatkit divodanprošeavttaid dohkkehuvvon plánaid vuođul.

Myrnes Balto háliida nannet bihtánsámi kultuvrra ja huksenárbevieru sierra áŋgiruššamiin ja sávvá ahte oallugat ohcet ovdal ohcanáigemeari, mii lea viiddiduvvon golggotmánu 31. beaivái 2023 dii. 15.00.

Almmuheapmi gávdno Sámedikki neahttasiidduin.

Doarjaga ohcá Sámedikki doarjjaportála bokte, Doarjjadikkis – Doarjagat sámi kulturmuitosuodjalussii. 

Loga eambbo Doarjagat sámi kulturmuitosuodjalussii doarjjaortnega birra dáppe.