– Sámediggi addá doarjaga doaibmavistti huksemii Ladnesullui

– Sámediggi addá doarjaga doaibmavistti huksemii Ladnesullui

Jan Erik Johnsen  Sámediggi juolludii 300 000 ruvnno doarjaga mielkerobohttii Jan Erik Johnsenii. Son ferte fearggain fievrridit buot lágan gálvvuid ruoktot ovdan sullui. Dat čájeha eanandoalli áŋgirvuođa, dadjá sámediggeráđđi Hans Ole Eira.

Hans Ole Eira Árvu/Sametinget  Johnsenis leat mielkegusat ja áigu dál investeret mielkerobohta álkidan dihte návetbarggu. Dál sus leat 28 mielkegusa ja áigu viiddidit buvttadeami 39 gussii.

– Sámediggi lea ilus go sáhttet juolludit doarjaga nu ahte boanddaide šaddá álkit doaimmahit beaivválaš barggu, lohka Eira.

Johnsen doaimmaha bearašfitnodat Ladnesullos Álttá suohkanis. Áltá lea Finnmárkku stuorimus eanadoallosuohkan, ja go boanddat investerejit doaibmavisttiide de dat sihkkarastá buori ovdánahttima eanandollui Álttás.

– Lea buorre ahte nuorra olbmot áŋgiruššet eanandollui, lohka Eira. Ladnesullo lea Álttá suohkanis olggumus doaresbealli, ja Sámediggái lea dehálaš sihkkarastit ahte doaresbeliin leat bargosajit. Diekkár investeren sihkkarastá eanadoallobirrasa Ladnesullos, loahpaha Eira.

Jearahallama addá ja gažaldagaid vástida sámediggeráđđi Hans Ole Eira (GB), tlf: +47 918 61 471, hans.ole.eira@samediggi.no