Prošeavtta ulbmil lea nannet nuoraid vásáhusa identitehtii, searvevuhtii ja gullevašvuhtii julevsámi guovllus. Oktasaš vásáhusaid bokte, ovttasbarggu bokte ja oahppama bokte luonddus, galgá prošeakta leat mielde buorideamen loaktima, buori psyhkalaš dearvvašvuođa ja oadjebas bajásšaddanbirrasa. 

Ann-Elise Finbog Árvu/Sámediggi

– Dát lea deaŧalaš doaibmabidju mii ovttastahttá giela, kultuvrra ja searvevuođa dakkár vugiin mii nanne nuoraid sihke sosiálalaččat ja identitehtalaččat. Go sámegiella ja árbevirolaš máhttu geavahuvvo árjjalaččat oadjebas rámmain, de dat bohciidahttá rámisvuođa ja gullevašvuođa, dadjá sámediggeráđđi Ann-Elise Finbog (SáB). 

Svierikváttsos lea árbevirolaš mátki Vájsaluovttas Ruoŧas gitta Vuodnabahtii (Hellmobotn) Hábmeris. Mátki manná historjjálaš deaŧalaš sámi kultureanadaga čađa, ja doaibmá oahppanarenan gielas, kultuvrras ja árbemáhtus. Mátki lea čađahuvvon juohke goalmmát jagi 1994 rájes. 

Doarjja juolluduvvo Givssideami ja sámevaši eastadeami doarjjaortnega bokte.