Sámi allaskuvla galgá ovttas Ruoŧa ja Suoma beale doaibmaoasálaččaiguin mielde hukset buoret sámi filbma- ja mediaoahppu. Dat galgá skuvlet eambbo sámi aktevrraid geat galget máhttit ráhkadit mediasisdoalu sámi árbevieruid ja kultuvrra vuođul, ođđa teknologiija ja gelbbolašvuođa bokte.  

Prošeakta lea ožžon doarjaga Interreg Auroras. Go Interreg gokčá dušše 50% doarjagis Norgga beale oasálaččaide, de lea Sámediggi juolludan 200 000 ruvnno doarjjan Sámi allaskuvlii gokčan dihte oasi goluin mat báhce. 

– Sámi filbma ja mediasuorgi lea hirbmadit ovdánan maŋimuš jagiid. Mii doaivut ahte dát prošeakta sáhttá leat mielde loktemin suorggi viidáseappot ja min mielas lea hui buorre go guovddáš ásahus nugo Sámi allaskuvla váldá rolla dán barggus, nu dadjá sámediggepresideanta Silje Karine Muotka (NSR). 

Sámi filbma- ja mediabuvttadeapmi lea dehálaš oassi Sámedikki kulturpolitihkalaš áŋgiruššamis. Filbma- ja mediabuvttadeapmi šaddá deháleabbon ja deháleabbon beassan dihte čájehit sámi árbevieruid ja kultuvrra positiivvalaš ja rievttes vuogi mielde. Sámediggi juolluda doarjaga danne go árvvoštallo ahte Interreg-prošeakta addá gelbbolašvuođaloktema mii nanne sámi filbma- ja mediasuorggi ja nu váikkuha Sámedikki ulbmilolahusa sihke kultursuorggis ja muđui.