Virgi lea jahkemearrevirgi guđa jahkái, mii Sámedikki čoahkkinortnega mielde galgá almmolaččat almmuhuvvot juohke ođđa áigodaga. Virgádeami mearrida sierra virgáibidjanlávdegoddi mii lea nammaduvvon Sámedikki dievasčoahkkimis juovlamánus 2025:s Sámediggepresideantta evttohusa vuođul.

Sámedikki direktevravirgái gullá sihke rolla leat njunuš jođiheaddji hálddahussii, ja ovddasvástádus leat politihkalaš doaimma oktavuođalađasin ja čállingoddin. Danne gáibida dát rolla sihke hálddašangealbbu, jođihanhárjáneami ja politihkkaipmárdusa.

Sámediggepresideanta Silje Karine Muotka Ørjan Marakatt Bertelsen

Sámedikkis leat sullii 155 bargi logi iešguđet kántorbáikkis. Sámediggepresideanta Silje Karine Muotka (NSR) oaivvilda ahte dát soaitá leat dat deháleamos jođiheaddjebargu Sámis.

– Direktevran don barggat daiguin eanemus gáibideaddji ja miellagiddevaš áššiiguin min servodagas. Dán virggis beasat ollu bargat politihkkáriiguin, ja seammás galggat jođihit ja ovddidit Sámedikki ásahussan, dadjá Muotka.

– Sámedikki direktevrras lea hui dehálaš doaibma sámi servodagas. Direktevran fertet máhttit bures jođihit, seammás go ovddidat ja nannet Sámedikki vai mii nagodit dustet vel eanet bargguid ja ovddasvástádusa, lasiha sámediggepresideanta.

Virgi almmuhuvvo ovttas Heia Nord-Norge rekrutterenfitnodagain, mii lea veahkkin dán proseassas. Mihttu lea geasi mielde oažžut olbmo virgái.

Loga eanet virggi birra