Sámediggi vuolggahii ášši oažžun dihte guorahallojuvvot prinsihpalaš áššiid stáhta konsultašuvdnageatnegasvuođa birra ja gáibádusaid birra guorahallat makkár váikkuhusat stuorát huksenmearrádusain sáhttet leat sámi kultuvrii ja ealáhusdoaimmaheapmái. 

– Mii váldit vuhtii lágamánnerievtti mearrádusa, muhto mii oaivvildit ain dan, ahte sámi beroštumiide ferte sihkkarastit duohta váikkuhanvejolašvuođa dakkár mearrádusproseassain mat sáhttet sakka váikkuhit min luondduvuđđui. Dás lea sáhka vuođđovuoigatvuođain ja das movt stáhta fuolaha iežas geatnegasvuođaid sápmelaččaid hárrái álgoálbmogin, dadjá sámediggepresideanta Silje Karine Muotka (NSR). 

Guovddáš gažaldahkan dán áššis lea leamaš ahte sáhttágo stáhta meannudit elektrifiserenmearrádusa sierra, nu ahte ii seammás guorahala dan viidáset fápmo- ja neahttahuksema mii čuovvu. Sámediggi lea deattuhan ahte dakkár lahkonanvuohki sáhttá dagahit ahte dat obbalaš váikkuhusat sámi beroštumiide eai árvvoštallojuvvo doarvái bures. 

– Konsultašuvdnariekti galgá sihkkarastit sámiide vejolašvuođa váikkuhit áššái ovdalgo mearrádus dahkkojuvvo. Go váldomearrádusat bidjet láidestusaid maŋit áiggi huksemiidda, de lea dehálaš ahte sámi beroštumit sáhttet buktit oaiviliiddiset dallego lea ain doaibmamunni. Dan prinsihpa ovdii áigu Sámediggi ain bargat, dadjá Muotka.

Sámediggi áigu dál vuđolaččat guorahallat lágamánnerievtti mearrádusa, ja erenoamážit movt riekti lea vuođuštan ja dulkon daid prinsihpalaš riekteáššiid mat leat boahtán ovdan áššis. Guorahallama vuođul árvvoštallá Sámediggi ahte guoddalago duomu Alimus riektái.